“Bëra thirrje për qetësi”, Simiq pranon se do të intervistohet si i dyshuar për barrikadat e 2022-ës në veri

Para dëgjimit në Prokurorinë Speciale të Kosovës në cilësinë e të pandehurit për sulm ndaj rendit kushtetues të Kosovës dhe vepra të tjera penale në lidhje me protestat e dhjetorit 2022, anëtari i kryesisë së Listës Serbe, Igor Simiq, ka deklaruar se “po shkon me kokën lart sepse e di se ai dhe anëtarët e tjerë të Listës Serbe si përfaqësues politikë kanë qenë pranë popullit të tyre, atëherë dhe sot”.

Në përpjekje për tu paraqitur i pafajshëm para dëgjimit në Prokurori, Simiqi ka pretenduar se ai dhe Lista Serbe “gjithmonë kanë qenë për paqe, kanë bërë thirrje për qetësi dhe përmbajtje tek qytetarët, dhe gjithmonë kanë bërë gjithçka që kanë pasur në dorë si parti politike për të ruajtur paqen në Kosovë”.

“Në këtë proces hyjmë dhe japim këtë deklaratë jo se besojmë se ky proces është i drejtë ose se bazohet në ndonjë provë për fajësinë e ndonjërit prej mbi dyzet serbëve që janë marrë në pyetje, por sepse e dimë që jemi të pafajshëm, e dimë që nuk kemi bërë asgjë të paligjshme dhe e dimë që si përfaqësues politikë kemi qenë pranë popullit tonë, atëherë, sot dhe do të jemi edhe nesër. Përfaqësuesit politikë serbë nuk kanë mundësinë që kanë disa përfaqësues politikë shqiptarë për të refuzuar thirrjet e prokurorit, sepse neve na kërcënohet arrestimi dhe paraburgimi, siç ka ndodhur me dhjetëra serbë më parë”, ka thënë Simiq.

Ai ka pretenduar se po shkon në dëgjim me kokën lart sepse e di që “nuk kanë bërë asgjë të paligjshme” dhe kanë qenë gjithmonë pranë popullit të tyre.

“Kjo është edhe një dëshmi tjetër për mënyrën se si bashkësia ndërkombëtare i kupton obligimet e saj ndaj popullit serb. Edhe në vitin 1999 kanë proklamuar karakterin multietnik të Kosovës. Deri në ditën e sotme kjo nuk respektohet, dhe çdo ditë ka gjithnjë e më pak serbë. Në vitin 2013 na u premtua Asociacioni i Komunave me shumicë serbe, dhe deri më sot kjo nuk ka ndodhur. Gjithçka që është përcaktuar me marrëveshje ndërkombëtare, pas të cilave kanë qëndruar edhe BE-ja dhe Kombet e Bashkuara, nuk është zbatuar në praktikë, sidomos kur bëhet fjalë për mbrojtjen e interesave të serbëve dhe përmirësimin e pozitës së komunitetit serb në këto hapësira”, ka përfunduar Simiq.