“Bëhu shpresë për Gazën” – mijëra njerëz protestojnë në Stamboll kundër Izraelit

Mijëra protestues pro Palestinës u mblodhën në sheshin Beyazit të Stambollit sonte në mbrëmje për të shprehur kundërshtimin e tyre ndaj veprimeve izraelite dhe urisë në Rripin e Gazës.

E organizuar me moton “Bëhu shpresë për Gazën”, demonstrata vazhdoi me një marshim drejt Xhamisë historike të Ajasofja.

Pjesëmarrësit synuan rritjen e ndërgjegjësimit për krizën humanitare dhe të shprehnin solidaritet me popullin e Gazës mes dhunës në rritje dhe mungesave të mëdha të ushqimit dhe furnizimeve mjekësore.

Organizatorët i bënë thirrje bashkësisë ndërkombëtare të ndërmarrë veprime urgjente për t’i dhënë fund vuajtjeve.

Izraeli po përballet me zemërim në rritje për shkak të luftës shkatërruese në Gaza, ku më shumë se 61.000 persona janë vrarë që nga tetori i vitit 2023.

Fushata ushtarake ka shkatërruar enklavën dhe e ka çuar atë në prag të urisë së përgjithshme.

Në nëntor të kaluar, Gjykata Penale Ndërkombëtare lëshoi urdhërarrest për kryeministrin izraelit Benjamin Netanyahu dhe ish-ministrin e tij të mbrojtjes Yoav Gallant për krime lufte dhe krime kundër njerëzimit në Gaza.

Izraeli përballet gjithashtu me një padi për gjenocid në Gjykatën Ndërkombëtare të Drejtësisë lidhur me luftën në enklavën palestineze. /AA