Begaj në Bosnje: Pavarësia e Kosovës është realitet i pakthyeshëm

Çështja e njohjes së Kosovës, gjegjësisht heqja e vizave për qytetarët e Kosovës dhe Bosnjë e Hercegovinës, ishte në qendër të konferencës së sotme për media të anëtarëve të Presidencës së Bosnjë e Hercegovinës dhe presidentit të Shqipërisë, Bajram Begaj, i cili ndodhet në një vizitë zyrtare në Sarajevë, raporton Anadolu.

Ndonëse delegacionet e të dy vendeve në takim diskutuan kryesisht për marrëdhëniet dypalëshe dhe integrimin evropian, në konferencën për media, kreu i Presidencës së BeH-së Denis Beqiroviq, anëtarët e Presidencës Zheljka Cvijanoviq dhe Zheljko Komshiq si dhe presidenti i Shqipërisë Bajram Begaj, u ndalën në çështjen e Kosovës, për të cilën nuk ekziston konsensus në Bosnje.

Kryesuesi i Presidencës së BeH-së, Denis Beqiroviq tha se “një mesazh shumë i rëndësishëm për bashkëpunimin rajonal” ka ardhur nga qeveria dhe kryeministri i Kosovës, Albin Kurti, të cilin e ka quajtur “mik i madh”.

“Ai mori një vendim të njëanshëm, që është heqja e regjimit të vizave për qytetarët e Bosnjë e Hercegovinës. Një lëvizje vërtetë e paprecedentë në rajonin tonë dhe një mesazh shumë i rëndësishëm”, tha Beqiroviq.

Duke folur për zbatimin e Marrëveshjes së Berlinit, anëtarja e Presidencës së BeH-së, Zheljka Cvijanoviq tha se është e rëndësishme që rajoni të funksionojë në katër liritë e përcaktuara në parimet e Bashkimit Evropian: liria e lëvizjes së njerëzve, mallrave, shërbimeve dhe kapitalit.

Cvijanoviq gjithashtu iu kundërpërgjigj kreut të Presidencës së BeH-së, Denis Beqiroviq, i cili në fjalën e tij e cilësoi kryeministrin e Kosovës, Albin Kurti, si “miku i tij i madh”.

“Nuk është e denjë për ne që ta përfshijmë Kosovën në bisedë me presidentin e një shteti tjetër. Pa marrë parasysh se është Republika e Shqipërisë. Kjo nuk është dhe nuk duhet të jetë tema e bisedës sonë, përveçse në kontekst të bashkëpunimit rajonal”, u shpreh Cvijanoviq.

Presidenti i Shqipërisë përsëriti se pavarësia e Kosovës është “realitet i pakthyeshëm”.

“Kosova është dëshmuar të jetë partner i besueshëm i përkushtuar për forcimin e fqinjësisë së mirë. Në ndërkohë, ajo ka kontribuar aktivisht në bashkëpunimin rajonal dhe proceset integruese euroatlantike në Ballkanin Perëndimor. Njohja e Kosovës patjetër do të ndikojë në paqe, siguri, pajtim dhe stabilitetin rajonal”, tha presidenti shqiptar.