Bayrou bëhet kryeministër i ri i Francës – ky është qëndrimi i tij më 1999 për ndërhyrjen e NATO-s në Kosovë

François Bayrou është emëruar kryeministër i ri i Francës. 73-vjeçari konsiderohet aleat i presidentit Emmanuel Macron, që kur ai erdhi në pushtet më 2017.

E Bayrou ka të kaluar të gjatë në politikën franceze. Në kohën kur NATO-ja ndërhyri në Kosovë më 1999, Bayrou ka qenë opozitar. Atë kohë e kishte mbështetur udhëheqësinë franceze për ndërhyrjen në Kosovë. 

Në një intervistë të “RTL” më 7 prill të 1999-s e kishte quajtur “lëvizje të mençur” nisjen e bombardimeve.

“Nuk kishte armëpushim (nga Millosheviqi). Për momentin, është lëvizje e mençur. Besoj se presidenti dhe qeveria kishin të drejtë kur thanë se ky armëpushim duhet të përcillet me kushte të caktuara, sidomos me ato që lidhen për sigurinë e refugjatëve që të kthehen menjëherë nëpër shtëpi. Dhe më pas, po ashtu, që të organizohej jetë e përbashkët e shqiptarëve dhe serbëve të Kosovës, pasi të dyja komunitetet do të duhet të jetojnë bashkë, sapo të arrihet një marrëveshje. Dera nuk është mbyllur plotësisht. Është e thjeshtë – kushtet duhet të përmbushen. Në çfarëdo rasti, është shenjë që Millosheviqi, me të gjithë arrogancën e tij e gjen veten të detyruar nga goditjet që të reflektojë. Nuk është tani koha që të ndalet aksioni”, kishte deklaruar ai.

Bayrou po ashtu kishte thënë se për bombardimet e NATO-s do të flitet gjatë nga historianët.

“Për dhjetë vjet, Millosheviqi ka shkaktuar 200 mijë vdekje. Historia e shekullit të 20-të na ka mësuar që secilën herë që bëhemi kinse nuk shohim diçka, ajo përfundon keq, sot apo nesër. Andaj kemi të drejtë që kemi reaguar. Është çështje tjetër se a mund të kenë qenë procedurat ndryshe”, ishte shprehur më tej Bayrou, që atë kohë ka udhëhequr partinë Unioni për Demokracinë Franceze (UDF).

Ai e kishte cilësuar veprimin e NATO-s si ndërhyrje që të respektohen të drejtat e njeriut. 

Kjo intervistë u gjet në “vie-publique.fr”, që është uebfaqe franceze e që menaxhohet nga një autoritet nën zyrën e kryeministrit francez, me mision për informimin, dokumentimin dhe arkivimin e vendimeve dhe intervistave të zyrtarëve francezë.