“Barbie” kampion i arkave filmike për dy javë rresht

Beteja mes filmave “Barbie” dhe “Oppenheimer” nuk ka përfunduar ende.

Shtatë ditë pasi projekti i regjisores Greta Gerwig dhe ai i Christopher Nolanit u betuan për të vendosur rekorde në arkat filmike, të dy filmat po shënojnë performancë jashtëzakonisht të mirë nëpër kinema.

“Barbie” arriti ti arkëtojë 93 milionë dollarë në javën e dytë të shfaqjes, të cilat i shtohen shumës totale të arkëtuar deri më tani prej 351 milionë dollarësh. Kjo e vërteton edhe një herë që interesimi i publikut në Amerikë dhe Kanada për projektin e mbushur me ngjyrë rozë, nuk e ka në mend të ndalet.

Edhe këtë javë në vendin e dytë u pozicionua drama “Oppenheimer”. Filmi arriti të shes bileta në vlerë prej 46.2 milionë dollarësh ekstra. Nga shfaqja nëpër kinematë e Amerikës Veriore, ky projekt ka arritur t’i mbledhë gjithsej 174 milionë dollar.

Në vendin e tretë gjendet “Haunted Mansion” i cili debutoi në arkat filmike me 24 milionë dollar të fituara. Pas tij renditet “Sound of Freedom” me 12.4 milionë dollar të fituara ekstra e që i shtohen shumës së arkëtuar për katër javë, që e kap shifrën prej 149 milionë dollarësh.

E top-pesëshja plotësohet me filmin aksion të yllit hollywoodian Tom Cruise, “Mission: Impossible — Dead Reckoning Part One”. Në javën e tretë të shfaqjes ky projekt shiti bileta në vlerë prej 10.7 milion dollarësh, ndërsa deri më tani në arkat filmike të Amerikës Veriore ka arritur që t’i mbledhë më afërsisht 140 milionë dollarë.