Bahtiri: Një marrëveshje e mundshme LVV-LDK nuk është kompromis i dobësisë, por një marrëveshje e mençurisë

Deputeti Agim Bahtiri ka deklaruar se Republika e Kosovës nuk ka luksin të mbetet në një cikël të pafund zgjedhjesh, duke theksuar se vendi përballet me procese të papërfunduara, negociata të rëndësishme me Serbinë dhe sfida jetike që kërkojnë lidership dhe bashkëpunim.

Sipas tij, një marrëveshje e mundshme mes Lëvizjes Vetëvendosje dhe Lidhjes Demokratike të Kosovës nuk do të përfaqësonte dobësi, por mençuri politike dhe përgjegjësi për ndërtimin e institucioneve të qëndrueshme dhe tejkalimin e ngërçit politik.

Bahtiri ka bërë thirrje që interesat e qytetarëve të vihen mbi interesat partiake, duke theksuar se pa unitet politik nuk mund të ketë pavarësi të vërtetë, e as zhvillim pa stabilitet.

“Populli ka folur përmes votës. Tani është koha që udhëheqësia të flasë me guxim,” ka theksuar ai, duke shtuar se e ardhmja e vendit nuk duhet të mbetet peng i së kaluarës. Kosova, sipas tij, nuk është pronë e askujt, por një amanet i gjeneratave që sakrifikuan dhe atyre që do të vijnë.