Babai i 21-vjeçarit Millosh Stojanoviq, i cili mbeti i plagosur të premten në Shtërpcë, ka thënë se djali i tij është ende i tronditur nga gjithçka që ka ndodhur dhe ka potencuar se shpreson që së shpejti ai t’i bashkohet familjes, raporton kosovoonline, transmeton GazetaDemos.
Stojanoviq bëri të ditur se mbrëmë ka vizituar të birin, në spitalin ku ai po qëndron i shtrirë, saktësisht KBC Graçanicë.
“Ai ndihet mirë, por është i tronditur për gjithçka që ka ndodhur. E gjithë kjo është e vështirë për të. Shpresojmë që ai të shërohet sa më shpejt dhe të kthehet në familje”, u shpreh ai.
Babai i 21-vjeçarit ka falenderuar mjekët dhe stafin e spitalit, të cilët janë përkujdesur për djalin e tij.
Ndër të tjera, ai tha se ka frikë për sigurinë e familjes së tij, por duhet të vazhdojnë përpara.
“Nuk e prisja që diçka e tillë të ndodhte ditën e Krishtlindjes. Do të doja që diçka e tillë të mos i ndodhte më kurrë, askujt”, përfundoi ai.
Përveç 21-vjeçarit Millosh Stojanoviq, të premten i plagosur mbeti edhe 11-vjeçari, Stefan Stojanoviq.