Avokati Musa: Arrestimi i Radoiçiqit është “hajgare”

Avokati, Skender Musa vlerëson se arrestimi i Millan Radoiçiqit është politik dhe është bërë me qëllim që të shfajësojë Serbinë, se kinse nuk ka qenë e përfshirë në sulmin terrorist në Banjskë të Zveçanit.

Musa thotë se arrestimi i Radoiçiqit është “hajgare” dhe përpjekje për ta mashtruar bashkësinë ndërkombëtare.

“Dhe nuk është pritë që atij t’i caktohet ndonjë masë e paraburgimit apo diçka tjetër, sepse kjo është bërë thjesht për qëllime politike, për ta amnistuar në njëfarë forme Serbinë apo presidentin e Serbisë, shefin e sigurimit shtetëror të Serbisë, se kinse ata nuk kanë qenë të përfshirë në sulmin terrorist, dhe qëllimi ka qenë të përjashtohet Serbia para faktorit ndërkombëtar se ka qenë vetë ajo që e ka përgatitur këtë sulm terrorist me Radoiçiqin. Dhe në fakt nuk është befasues, kjo ka qenë një hajgare dhe një përpjekje për ta mashtruar bashkësinë ndërkombëtare, sidomos vendet e Quint-it”, deklaroi ai në Tëvë 1.

Sipas tij, nëse Serbia do të ishte e interesuar për ta zbardhur këtë çështje, pas arrestimit, do t’ia dorëzonte Radoiçiqin autoriteteve të Kosovës.

Gjykata e Lartë e Serbisë të mërkurën ka liruar Milan Radoiçiqin një ditë pasi e arrestoi. Atij i është konfiskuar pasaporta dhe i është ndaluar shkuarja në Kosovë.

Ai po ashtu është i detyruar që me data 1 dhe 15 të çdo muaji të paraqitet para një stacioni policor në Beograd.