Avokati Arifi: KQZ-ja s’ka mandat që ta shqyrtojë peticionin për largimin e kryetarëve në veri

Avokati Qëndrim Arifi ka thënë se Komisioni Qendror i Zgjedhjeve aktualisht nuk ka mandat ligjor për ta shqyrtuar peticionin e qytetarëve në veri të vendit për t’i larguar katër kryetarët e komunave atje.

Ai tha se nëse rrugës bëhet ndonjë ndryshim, mundet që në proces të futet ndonjë ndryshim i ligjit apo ndonjë rregullore e brendshme e KQZ-së që mundohet t’i jep vetes mandat që ta menaxhojë këtë proces.

“Si do të numërohen ato nënshkrime, cilat janë mekanizmat që ato nënshkrime janë të sakta dhe janë prej personave që janë nënshkruar atje. Nuk ka askush mandat sepse s’ka dispozita ligjore. Ish dashur që Ligji për Zgjedhje Lokale paralelisht me këtë Udhëzim Administrativ të pësojë një ndryshim, respektivisht të shtohet edhe pjesa se si do të sillet KQZ-ja, cilat janë mekanizmat e vërtetësisë së nënshkrimeve të qytetarëve në mënyrë që t’i jepet një zgjidhje komplet ligjore këtij procesi”, tha Arifi në Klan Kosova.

Tutje, Arifi tha se në këto rrethana, për sa i përket organizimit të peticionit, problemi është politik pasi është përzier me çështjen ligjore.

“Pra, kur mungon vullneti, atëherë verbëria është prezente në këto dispozita. Mendoj që këtu kemi mungesë të vullnetit që në këto komuna të organizohet peticioni. Po të ishte ky vullnet, s’do të ishte shumë e vështirë që duhet të kemi edhe ndryshime të tjera e jo vetëm me një Udhëzim Administrativ”, tha ai.