Asamblisti Sveçla i gatshëm për sfidën e narko-testit: Qytetarët do ta dinë kush janë përfaqësuesit e tyre

Pas arrestimit të asamblistit të Lëvizjes Vetëvendosje në komunën e Prishtinës, Besnik Mujeci për trafikim droge, është dhënë ideja që të bëhet testi i përdorimit të narkotikëve për të gjithë zyrtarët e institucioneve.

I gatshëm për pranimin e narko-testit, është shprehur Gëzim Sveçla, Kryetar i Grupit të Asamblistëve të Lëvizjes Vetëvendosje në Prishtinë.

Në emisionin Magazina, në Radio Dukagjini, Sveçla duke e pranuar këtë testim ka thënë se qytetarët do ta dinin se kush janë përfaqësuesit e tyre.

“Si koncept mua po më pëlqen. Nuk e di a ekziston baza ligjore për një veprim të tillë, por edhe nëse nuk ekziston dhe nëse ka interes, kjo mund të arrihet. Pse mos të bëhet, që qytetarët ta kuptojnë se kush janë përfaqësuesit e tyre, qoftë në institucionet qendrore, qoftë në ato komunale.” – ka thënë Sveçla.