Armenia del jashtë orbitës së Putin, Pashinyan thotë se Moska nuk reagoi kur vendin e tij e sulmoi Azerbejxhani

Armenia ka ngrirë pjesëmarrjen e saj në Organizatën e Traktatit të Sigurisë Kolektive (CSTO), tha kryeministri Nikol Pashinyan.

Pas më shumë se dy dekadash si pjesë e një aleance ushtarake të udhëhequr nga Moska, Armenia e ka pezulluar anëtarësimin e saj si rezultat i një përçarjeje në rritje me Rusinë e Vladimir Putinit.

Duke folur për France 24 të premten, kryeministri armen, Nikol Pashinyan tha se Organizata e Traktatit të Sigurisë Kolektive (CSTO), një klub i vendeve ish-sovjetike, “nuk i ka përmbushur detyrimet e saj të sigurisë ndaj Armenisë”.

“Kjo nuk mund të kishte kaluar pa pasoja. Dhe pasoja është se në praktikë ne e kemi ngrirë pjesëmarrjen tonë në CSTO,” tha Pashinyan. Ai  akuzoi Moskën për dështimin për të ndërhyrë në një konflikt që po ziente me Azerbajxhanin fqinj, i cili nuk është anëtar i kësaj aleance.

Tensionet kulmuan në shtator kur Azerbajxhani nisi një ofensivë për të rimarrë rajonin separatist të Nagorno-Karabakut të mbështetur nga Jerevani, duke shkaktuar një eksod të 100,000 armenëve nga aty. Moska kishte vendosur një forcë paqeruajtëse në rajon që braktisi pozicionet e saj përpara sulmit.

Ditë më parë, Pashinyan tha për POLITICO se misioni i Moskës kishte dështuar dhe “si rezultat i ngjarjeve në Ukrainë, aftësitë e Rusisë kanë ndryshuar”, duke e bërë atë më pak të gatshme ose më pak të aftë për të mbrojtur partnerët e saj. Armenia, shtoi ai, tani po punon me BE-në dhe SHBA-në për të kryer një sërë reformash demokratike dhe për të forcuar demokracinë e saj.

Komentet e fundit të kryeministrit vijnë ndërsa ministri francez i Forcave të Armatosura Sébastien Lecornu viziton Armeninë të premten për të njoftuar një paketë marrëveshjesh të reja armësh që pritet të përfshijnë pajisje radari dhe syze për shikim natën.

Por, pavarësisht se pret një mision kufitar të BE-së, Armenia ka mijëra trupa ruse të stacionuara në vend dhe kufijtë e saj kontrollohen nga forcat e sigurisë të Moskës. Ndërsa Pashinyan ka lënë të kuptohet më parë se ato marrëveshje me Rusinë mund të përfundojnë, ai paralajmëroi “ky është një kuadër krejtësisht i ndryshëm ligjor-kontraktor” për anëtarësimin e Armenisë në CSTO.

Duke iu përgjigjur deklaratës të premten, sekretari i shtypit i Kremlinit Dmitry Peskov tha se Armenia nuk kishte paraqitur asnjë njoftim zyrtar për vendimin. “Është shumë e rëndësishme të kuptosh detajet këtu,” vazhdoi ai, “dhe shpresojmë se miqtë tanë armenë do të na shpjegojnë gjithçka.”