Ardon Jashari drejt Milanit – marrëveshja personale arrihet, pritet vetëm drita jeshile nga klubi belg

Një hap i madh është bërë në drejtim të transferimit të Ardon Jasharit te gjiganti italian AC Milan.

Sipas gazetarit të njohur të merkatos Nicolo Schira, drejtori sportiv i kuqezinjve, Igli Tare, ka arritur marrëveshje personale me agjentët e futbollistit shqiptar.

Marrëveshja parashikon që Jashari të jetë pjesë e Milanit deri në vitin 2030, me një pagë vjetore prej 2.4 milionë euro.

Lëvizja shihet si pjesë e strategjisë së re të klubit për të forcuar mesfushën me talente të rinj dhe me potencial afatgjatë.

Megjithatë, transferimi nuk është ende zyrtar, pasi marrëveshja mes dy klubeve nuk është finalizuar. Klubi belg ku aktivizohet Jashari nuk ka dhënë ende aprovin përfundimtar për këtë lëvizje.

Në rast se gjithçka shkon sipas planit, Ardon Jashari pritet të jetë shenja e parë e investimeve të Milanit në repartin e mesfushës për sezonin e ri.