Apple prezanton iPhone Air, telefonin më të hollë ndonjëherë – mban baterinë gjithë ditën
Përveç Iphone 17, Apple ka prezantuar sot edhe “Iphone Air”, versionin e ri dhe më të hollë të iPhone-it, të cilin e përshkroi si “aq i hollë dhe i lehtë, sa duket sikur zhduket në duart tuaja,” tha John Ternus, Zëvendës President i Lartë për Inxhinierinë e Pajisjeve, shkruan CNN.
I quajtur iPhone Air, ai është ndërtuar nga titan i përdorur në anijet kozmike dhe ka një ekran me mbrojtje qeramike (ceramic shield), që Apple e cilësoi si më të qëndrueshmin ndonjëherë.
iPhone Air, modeli më i hollë i iPhone-it ndonjëherë, vjen me një ekran 6.5 inç, që qëndron gjithmonë i ndezur (always-on display), dhe me skaje prej vetëm 5.6 milimetrash. Ai është ndërtuar me 80% titan të ricikluar, përqindja më e lartë ndonjëherë e materialeve të ricikluara në një iPhone, sipas Apple.
iPhone Air do të jetë i disponueshëm në katër ngjyra: e zezë hapësinore (space black), e bardhë re (cloud white), ar i lehtë (light gold) dhe blu qielli (sky blue). Pajisja do të ketë një kamerë të pasme dhe një kamerë të përparme.
Ky model përfshin çip të prodhuar nga vetë Apple, i cili sjell fuqi më të madhe për funksionalitetet me inteligjencë artificiale — një drejtues i Apple e përshkroi atë si “fuqi kompjuterike në nivelin e MacBook Pro, brenda një iPhone-i” — dhe përmirësim të lidhjes pa tela.
iPhone Air do të përdorë vetëm karta e-sim në të gjithë botën, për të mundësuar dizajnin e tij ultra të hollë. Gjithashtu, Apple tha se do të ketë bateri që zgjat gjithë ditën, edhe pse ende nuk është sqaruar se sa orë përfshin kjo.
