Apel Urgjent për Ndihmë: Ish-ushtarja e UÇK-së  Shqipe Krasniqi ka nevojë për ndihmën tuaj

Organizata e Veteranëve të Luftës së Ushtrisë Çlirimtare të Kosovës (OVL-UÇK) – Dega në Malishevë, bashkë me nëndegët e saj në fshatra, bëjnë thirrje urgjente për ndihmë për jetën e Shqipes Krasniqi, njëra nga luftëtaret e para të Ushtrisë Çlirimtare të Kosovës.

Shqipe Krasniqi po përballet me një sëmundje të rëndë dhe ka nevojë për një operacion jetik në Itali, por nuk ka mundësi financiare për ta përballuar këtë shpenzim. Ajo ka sakrifikuar shumë për lirinë e Kosovës dhe tani është radha jonë që t’i kthejmë borxhin duke mbështetur motrën tonë në nevojë.

OVL-UÇK në Malishevë bën apel te të gjithë bashkëluftëtarët, qytetarët e Malishevës dhe më gjerë, si dhe njerëzit me zemër të madhe që të kontribuojnë sipas mundësive të tyre. Çdo ndihmë, pavarësisht madhësisë, është një shpresë më shumë për Shqipen.

Njoftimi i plotë:

KËRKESË URGJENTE PËR NDIHMË – TË SHPËTOJMË JETËN E MOTRËS SË LUFTËS, SHQIPE KRASNIQI

Të nderuar bashkëluftëtarë,

Të nderuar qytetarë të Malishevës e më gjerë,

Të gjithë ju njerëz të vullnetit të mirë e zemrës së madhe,

Organizata e Veteranëve të Luftës së Ushtrisë Çlirimtare të Kosovës – Dega në Malishevë, së bashku me nëndegët nëpër fshatra, ju drejtohet me këtë thirrje të sinqertë dhe URGJENTE për ndihmë.

Motra jonë, Shqipja e luftës – Shqipe Krasniqi – njëra ndër luftëtaret e para të Ushtrisë Çlirimtare të Kosovës, sot ka nevojë për luftën tonë të përbashkët, për jetën e saj. Shqipja përballon një sëmundje të rëndë dhe ka nevojë të menjëhershme për një operacion jetik në Itali, të cilin nuk mund ta përballojë financiarisht pa ndihmën tonë.

Shqipja nuk ka luftuar vetëm për familjen e saj, por për të gjithë ne, për këtë tokë dhe për lirinë që sot e gëzojmë. Sot është radha jonë ta ndihmojmë atë – si motër, si shoqe, si heroina e heshtur e luftës sonë të shenjtë.

Apelojmë me gjithë zemër te çdo bashkëluftëtar, te çdo qytetar i ndërgjegjshëm, te çdo zemër e madhe që të kontribuoni sipas mundësive tuaja. Edhe një shumë e vogël, është një hap më afër shpëtimit të jetës së saj.

Mos ta lëmë vetëm Shqipen në këtë betejë! Le të tregojmë se jemi popull me zemër të madhe, që nuk i harron kurrë bijtë dhe bijat e saj që sakrifikuan për liri!

Për të gjithë ata që duan të kontribuojnë, ndihmat mund të bëhen në këtë llogari bankare:

Emri: Shqipe Krasniqi

Banka: Raiffeisen Bank Kosovo

IBAN: XK051502001001905122

SWIFT code: RBKOXKPR

Gjithashtu, për informata dhe koordinim mund të drejtoheni te kryetarët e nëndegëve të OVL-së në fshatrat përkatëse.

Zoti ju shpërbleftë për çdo ndihmë, për çdo lutje, për çdo solidaritet.

Jetën e një motre nuk e lëmë në dorë të fatit – ne jemi këtu për të luftuar bashkë!