Anulimi i vizitave në mes Kosovës e Serbisë vlerësohen lojëra politike

Kosova i është kundërpërgjigjur shpejt Serbisë pasi ministrit të Punëve të Brendshme, Xhelal Sveçla, ia refuzoi vizitën në Preshevë, Medvegjë dhe Bujanoc.

Të mërkurën, kur njoftoi për rastin e Sveçlës, Ministria kosovare e Punëve të Jashtme ia refuzoi kërkesën për vizitë ministrit serb për Informacion dhe Telekomunikacion, Dejan Ristiq.

Kosova e akuzoi Serbinë për shkelje të marrëveshjes së Brukselit për vizitat zyrtare, derisa të njëjtën gjë e bëri edhe pala serbe.

Këto veprime po i duken lojëra politike profesorit universitar, Milazim Krasniqi.

“Nuk arrij t’i kuptoj arsyet e vizitës së ministrit për të vizituar Luginen e Preshevës siç nuk e kam të qartë se çka mund të kërkojë ministri i Brendshëm. Këto janë thjesht lojëra politike që bëhet për provokim të njëri tjetrit e për rejtingun politik ndërsa, çështje të tilla do duhej të akorodoheshin paraprakisht dhe jo të bëheshin pjesë e presioneve mbi opinionin publik”, ka thënë Krasniqi.

Por ndonëse marrëveshja po shkelet, për Krasniqin fajtor është vet Brukseli.

“Brutaliteti me të cilin shkelet Marrëveshja e Brukselit në mënyrë të dyanshme është lapidare tashmë dhe kjo tregon mungesën e vullnetit të Brukselit për të shtyrë përpara procesin e negociatave dhe marrëveshjeve ashtu që është lejuar kjo lojë e qeverive të Kosovës e Beogradit. Tash është bërë e zakonshme por po provokon në instancë të fundit, farën e një keqkuptimi ose ndonjë konflikti në të ardhmen”, ka shtuar Krasniqi.

Megjithatë, për ish-diplomatin Blerim Canaj, veprimet e palëve nuk përbëjnë habi.

“Nuk është diçka e re, s’është diçka që nuk ka ndodhur. Për shembull në Kosovë janë ndaluar politikanët serb për shkak të gjuhës që kanë përdorur përherë pas takimeve me pakicën serbe këtu por çka po vërehet është se përkundur përpjekjeve të Bashkësisë Kombëtare për një moralizim raportesh, vet refuzimi i vizitave tregon që s’ka të reja. Se a do të ketë pasoja, është e vështirë të thuhet sepse shtetet veprojnë si të pavarura dhe të dyjat kanë një “win-win”. Jemi në fushatë zgjedhore dhe në sendimentin nacional, ia ndihmon subjektit”, ka thënë Canaj. /Dukagjini/