Angelina Jolie thotë se “liderët botërorë janë bashkëfajtorë” në krimet në Gaza

Aktorja Angelia Jolie ka reaguar rreth luftës Izrael-Hamas duke e quajtur bombardimin në Gaza “të qëllimshëm”

“Ky është bombardim i qëllimshëm i një popullate të bllokuar që nuk ka ku të ikë. Gaza ka qenë një burg i hapur për gati dy dekada dhe po bëhet me shpejtësi një varr masiv. 40 për qind të të vrarëve janë fëmijë të pafajshëm”, tha Joilie në një postim në Instagram, raporton Klankosova.tv.

Jolie tha se miliona civilë palestinezë, fëmijë, gra, familje po ndëshkohen duke u privuar nga nevojat esenciale për njeriun.

“Ndërsa bota shikon dhe me mbështetjen aktive të shumë qeverive, miliona civilë palestinezë – fëmijë, gra, familje – po ndëshkohen dhe dehumanizohen kolektivisht, të gjithë duke u privuar nga ushqimi, ilaçet dhe ndihma humanitare kundër ligjit ndërkombëtar”, tha Angelina Jolie, ish e dërguar speciale për UNHCR-në.

Aktorja shtoi se liderët botërorë janë bashkëfajtorë në krimet e kësaj lufte.

“Duke refuzuar të kërkojnë një armëpushim humanitar dhe duke bllokuar Këshillin e Sigurimit të OKB-së që të vendosë një të tillë për të dyja palët, liderët botërorë janë bashkëfajtorë në këto krime”, theksoi aktorja holivudiane.

Që nga 7 tetori, kur Hamasi kreu inkursionin në Izrael, rreth 8,800 palestinezë janë vrarë në Gaza.