Një nga aksionaret e klubit të Rapid Bukureshtit, Victor Angelescu, ka deklaruar se e vënë re Albion Rrahmanin në ndeshjet e zhvilluara nga CFR Cluj me Ballkani sezonin e kaluar, në grupet e Ligës së Konferencës.
Ai tha se kishin shumë besim te sulmuesi kosovar, andaj edhe e kërkonin me ngulm transferimin e tij, shkruan Gazeta Express.
“Ne kishim shumë besim te Rrahmani, kishim negociuar për një kohë të gjatë dhe e donim shumë. E pashë për herë të parë kur luajti ndaj CFR dhe pas kësaj vazhdova ta ndjek. Ishte golashënuesi më i mirë në kampionatin e Kosovës, ishte thirrur edhe në kombëtare para se të vinte te ne. Ai ishte një sulmues i ri që na dukej shumë interesant. Ne filluam negociatat me klubin dhe e transferuam atë. E kisha vënë re që kur luante ndaj CFR. Kështu bënë edhe ata, prandaj e morën Krasniqin (Ermal). Ne ishim mjaft specifik. Ne negociuam që në fillim, ofruam shuma të caktuara, biseduam me lojtarin, e bindëm për projektin”, tha fillimisht Angelescu për “GSP”.
“Nuk e di kush tjetër e donte, por ne e donim më shumë. Nuk mendoj se ka problem që të mos kthehen këto para, siç duket Rrahmani për momentin. Fillimisht e sollëm të na ndihmojë, sepse kishim vetëm një sulmues, edhe pse Marko (Dugandzic) ishte golashënuesi më i mirë i kampionatit dhe luajti shumë mirë edhe këtë fillim sezoni. Pasi u largua Kevin Luckassen, ne kishim vetëm një sulmues. Bergodi mund të kishte luajtur me dy sulmues. Nuk e di se si mund ta largoni Rrahmanin nga skuadra pasi ai shënoi 4 gola. Por, në të njëjtën kohë, Dugandzic ishte golashënuesi më i mirë i kampionatit dhe vazhdon të jetë”, deklaroi Angelescu.
Kujtojmë se Rrahmani u transferua këtë verë nga Ballkani te Rapidit, me klubin nga Bukureshti që pagoi 600 mijë euro për të nënshkruar me sulmuesin kosovar.
23-vjeçari e ka nisur për mrekulli aventurën e tij në elitën e futbollit rumun, duke shënuar katër gola në dy paraqitjet e para.