Ambasadori suedez: Kosova duhet të punojë në themelimin e Asociacionit

Ambasadori suedez në Kosovë, Jonas Westerlund, thotë se Kosova duhet të punojë në themelimin e Asociacionit.

Westerlund thotë se draft-statusi aktual i Asociacionit nga aspekti politik nuk jep kompetenca ekzekutive.

“Mendoj që duhet tash të vazhdojmë përpara. Kemi marrëveshjen e Brukselit – 27 shkurt dhe Ohrit më 18 mars, dhe kjo duhet të implementohet. Siç thanë liderët evropianë dje në Bruksel, Kosova duhet të vazhdojë me Asociacionin. I kuptoj brengat kur vijmë te themelimi i Asociacionit sa i përket autoritetit ekzekutiv, por kemi kaluar këtë problem pasi drafti aktual, nga aspekti politik nuk jep kompetenca ekzekutive. Pastaj është pikëpamja ligjore që duhet të bëhet, jam i vetëdijshëm për këtë”, tha ambasadori suedez në Tëvë1.

Ai tha se Suedia e mbështet këtë draft, por që sipas tij edhe Gjykata Kushtetuese duhet ta jap vlerësimin e saj.

“Mendoj që është i padrejtë krahasimi me Republika Srpska, sepse nuk mund ta krahasoni me situatën në Bosnjë e Hercegovinë. Numri i serbëve në Kosovë, sipas përqindjes është shumë, shumë më i vogël… Por, e kuptoj brengosjen nga Qeveria sa i përket kësaj. Por, besoj që drafti që e kemi para nesh tash është një draft i mirë, dhe Suedia e përkrahë këtë draft. Ka marrë parasysh brengat e Qeverisë së Kosovës. Ashtu është hartuar, që të merret dhe të largojë brengat e Qeverisë së Kosovës. duhet të presim për vendimin nga Qeveria e Kosovës, dhe pastaj Gjykata Kushtetuese duhet të jep vlerësimin e saj”, shtoi ai