Ambasadori i Kosovës në Kuvendin e Polonisë: Mbështetje e pakushtëzuar për Ukrainën

Ambasadori i Kosovës në Poloni, Drilon Gashi, mori pjesë në Konferencën Ndërparlamentare Evropiane në Kuvendin e Polonisë, ku theksoi mbështetje të pakushtëzuar për Ukrainën dhe përkujtoi rëndësinë e ndërhyrjes së NATO-s në vitin 1999 në Kosovë.

Gashi theksoi se “zëri ynë mund të jetë i vogël, por është një zë i pa kushte i mbështetjes për një Ukrainë që të jetë e lirë, e plotë dhe në paqe.”

“Dje, 26 vjet më parë, shumë nga shtetet në këtë sallë morën vendimin e vështirë, por të drejtë për të realizuar një ndërhyrje humanitare të NATO-s kundër regjimit të Milosheviçit dhe për të mbrojtur popullatën shqiptare të Kosovës. Prandaj, kërkoj dhe shpresoj për të njëjtin vendim dhe forcë sot për të gjetur mbështetje për partnerët tanë në Ukrainë dhe në mbrojtje të Ukrainës”, tha ai.

Ai gjithashtu përmendi shkeljen e rezolutave të Kombeve të Bashkuara nga Serbia gjatë luftërave të saj në Ballkan dhe kërkoi një angazhim të ngjashëm për të mbështetur Ukrainën në këto kohë të vështira. Gashi theksoi përkushtimin e Kosovës për të investuar në mbrojtje dhe për zhvillimin e mëtejshëm të kapaciteteve dhe prodhimit të mbrojtjes në partneritet me aleatët.

Së fundmi, ambasadori Gashi shprehu angazhimin e Kosovës për arritjen e njohjes reciproke dhe normalizimin e marrëdhënieve me Serbinë.