Ambasada me proverb gjerman i reagon Serbisë për ndërtimin e urave: “Së pari pastro para derës tënde”

Ambasada Gjermane në Kosovë ka reaguar ndaj letrës së fundit të Petar Petkoviq, në të cilën ai i bën thirrje Bashkimit Evropian, shteteve anëtare dhe palëve të tjera të ndalojnë atë që ai e quan “veprime eskaluese të Prishtinës”, konkretisht ndërtimin e dy urave shtesë mbi lumin Ibër në Mitrovicë.

Në një deklaratë për media, Ambasada e Gjermanisë, thekson se Qeveria e Kosovës duhet të heqë dorë nga veprimet eskaluese, por thekson se thirrjet për de-eskalim duhet të jenë të barabarta për të gjitha palët.

“Ashtu siç e kemi deklaruar vazhdimisht, i bëjmë thirrje Qeverisë së Kosovës të heqë dorë nga veprimet eskaluese. Megjithatë, thirrjet për de-eskalim duhet të zbatohen në mënyrë të barabartë për të gjitha palët” thuhet në deklaratë.

Megjithatë, Ambasada kritikon mosndjekjen e autorëve të sulmit të Banjska dhe përmend rastin e udhëheqësit të sulmit, ish-nënkryetarit të Listës Serbe, Radoiçiq i cili sipas saj lëviz lirshëm në territorin serb pavarësisht pranimit të përgjegjësisë.

“Sigurisht që nuk është Qeveria e Kosovës ajo që po dështon të zbatojë masa ligjore kundër atyre që janë përgjegjës për sulmin e tmerrshëm në Banjskë. Fakti që udhëheqësi i vetëshpallur i atij sulmi, z. Radoiçiq, pranoi publikisht përgjegjësinë dhe megjithatë vazhdon të lëvizë lirshëm në territorin serb, minon thellësisht përpjekjet për të nxitur besimin dhe llogaridhënien në rajon”, thuhet në deklaratën e Ambasadës gjermane.

Ambasada citon një proverb gjermane për të theksuar rëndësinë e rregullimit të çështjeve të brendshme para se të kritikohen të tjerët.

“Në gjermanisht themi, ‘Erstmal vor der eigenen Haustür kehren’ – së pari pastro para derës tënde. Kjo fjalë e urtë na kujton se duhet të rregullosh shtëpinë tënde përpara se ta qortosh vazhdimisht Kosovën për vendimet e saj”, thuhet tutje në deklaratë.

Në fund, Ambasada vë në dukje se mosveprimi ndaj dhunuesve është po aq i dëmshëm sa edhe veprimet e pa koordinuara nga Prishtina.