Aksion policor në Prizren, një person arrestohet për armëmbajtje pa leje

Mbrëmjen e kaluar, më 21 qershor, Policia e Kosovës zhvilloi një operacion të gjerë në qytetin e Prizrenit, në kuadër të planit operativ “Sezoni Veror 2025”.

Kështu ka bërë të ditur zëdhëndës polici për rajonin e Prizrenit, Shaqir Bytyqi.

Ky plan ka për qëllim forcimin e sigurisë publike dhe parandalimin e dukurive të kundërligjshme gjatë muajve të verës.

Operacioni u realizua nga Stacioni Policor në Prizren, në bashkëpunim me Njësitin Kundër Trafikimit me Narkotikë dhe Njësitë e Reagimit të Shpejtë (NJRSH) nga Prishtina, Gjakova dhe Ferizaji, si dhe nën koordinimin e ngushtë me Prokurorinë Themelore në Prizren.

Gjatë kontrolleve të befasishme në disa lagje të qytetit, në lokale dhe automjete të ndryshme, është identifikuar një person që mbante me vete një thikë brezi. I dyshuari është shoqëruar në stacionin policor për intervistim dhe ndaj tij është iniciuar procedurë hetimore për veprën penale “Mbajtja në pronësi, kontroll ose posedim i paautorizuar i armëve.”

Policia e Kosovës bën të ditur se aksione të tilla do të vazhdojnë edhe në ditët në vijim, me qëllim garantimin e rendit dhe sigurisë për të gjithë qytetarët, në veçanti gjatë sezonit veror