“Adriani ka qenë shumë strateg”, Ilir Krasniqi tregon arsyen e ndryshimeve në fotografi të Heroit të Kosovës

Ka pak foto, mirëpo në ato që shihet, dëshmori i UÇK-së, Adrian Krasniqi nuk shihet as edhe një herë njësoj në paraqitjen e jashtme.

Kjo siç duket e kishte një arsye, për të cilën në emisionin “n’Demos” ka folur vëllai i tij, një nga bashkëpunëtorët më të ngushtë të Adrianit.

Ilir Krasniqi fillimisht ka treguar se tërë paratë që ia dërgonte për investim në banesën që ia kishte blerë në Tiranë, vëllai i tij i kishte shpenzuar në armatim.

“Jam kthyer në Tiranë, i thash Agimit gjeje një banesë, po don me jetu në Tiranë, i thash nashta lufta zgjatë 10 vjet e 20 vjet, e nuk po du me iu bo barrë askujt. E kemi gjetë banesën, por kur është ble banesa, ia kam lanë paret për me e mobilu edhe kam shku për në Gjermani, kur jam ardh prej Gjermanie e shoh asnjë sen në to. Aty kanë shkuar Rexhep Selimi, Sylejman Selimi, Daut Haradinaj, Mujë Krasniqi, i gjithë grupi i furnizimit kanë shku aty. Më pas i tham Adrianit, çka u bo me pare, tha paret kanë shku krejt në hekra në Kosovë. Më pas ia lash një kerr, i thash shite këtë kerr e mobiloe, tha në rregull, shkova unë në Gjermani, kur vi për së dytë e shoh përsëri banesën thatë, i thash e tash, tha edhe ato para kanë shku në Kosovë, unë se kam mendjen me gjallnu”, është shprehur ai, përcjell GazetaDemos.

Ai e ka vlerësuar vëllain e tij, si një nga strategët më të mëdha të UÇK-së.

“Adriani ka qenë shumë strateg, kur dilshim me të në qytet të Tiranës, thoshte këtu ka tylifare, e qitke një voth në vesh, e një shami në ballë, e thoshte kur të shohin kështu atyre iu humb fijen. Kur e sheh tjetrën, Adriani në asnjë fotografi nuk është njësoj, në çdo rast është maskuar në forma të ndryshme. Adriani ka pasur me shku me Zahirin, në Prishtinë e kanë pas një banesë ilegale , si duket atë e kanë zbuluar sigurimi, kur kanë hyrë brenda i zoti i shtëpisë i kanë thanë kenë këta strujagjitë e kqyrën sahatin, Adriani i thotë Qerim puna është keq se rryma është e paguar, ata më pas janë tërhek prej baze, kur është vra Zahiri, Adriani ka qenë shumë i mërzitur, se ka pasur shumë shpresë tek ai”, ka përfunduar Krasniqi.

Emisioni i plotë: