Abdixhiku uron Lukas Mandl dhe David McAllister për rizgjedhjen si eurodeputetë në PE

Lideri i LDK-së, Lumir Abdixhiku ka uruar Lukas Mandl dhe David McAllister për rizgjedhjen si eurodeputetë në Parlamentin Evropian.

“Fitorja e tyre është festa e jonë. LDK dhe Kosova, i ka dy dyer shumë të rëndësishme dhe me shumë ndikim në këtë Parlament.”, deklaroi ai.

Postimi i plotë:

Lukas Mandl dhe David McAllister, dy miq të mëdhenj të Kosovës dhe popullit tonë, rizgjedhen eurodeputetë në Parlamentin Evropian.

Gjersa të tjerët angazhoheshin në organizimin e tubimeve për ndarje të shqiptarëve në Maqedoni, LDK-ja, në prill, u morr me përbashkimin e bashkatdhetarëve tanë rreth miqve të vendit. Prandaj dhe mbajtëm dy tubime mobilizuese në Hamburg e në Vjenë, si thirrje mbështetëse për Lukas e David, si kontribut patriotik ndaj vendit.

Këtë mëngjes, në biseda të ndara telefonike, urova David McAllister (CDU) dhe Lukas Mandl (ÖVP) për zgjedhjet e tyre respektive. Fitorja e tyre është festa e jonë. LDK dhe Kosova, i ka dy dyer shumë të rëndësishme dhe me shumë ndikim në këtë Parlament.

Sot, dua të falënderoj secilin shqiptar që nëpërmjet votës së tyre, siguruan që zëri ynë të përfaqësohet fort në tempullin e demokracisë evropiane. Ju faleminderit që si rrallë herë më parë ishit kaq të organizuar e me kaq përkushtim.

Familja jonë politike, EPP, ka shënuar fitore të thellë në këto zgjedhje. Qendra e djathtë triumfoj me plot 186 ulëse në Parlamentin evropian, 10 më shumë se pesë vite më parë duke mbetur forcë dominuese në politikën kontinentale.

EPP, sërish, mbetet zë i arsyes e i ëndrrës evropiane, gjersa vlerat e djathta, të demokracisë, besimit në Zot, familje e në shtet, janë vlera thelbësore evropiane. Të njëjtat i projektojmë dhe në Kosovë!