Abdixhiku nga Kamenica: Me Shaip Surdullin drejt zhvillimit, vota për LDK-në është vota kundër krizës

Lidhja Demokratike e Kosovës prezantoi sot kandidatin e saj për kryetar të komunës së Kamenicës, profesorin Shaip Surdulli, një emër i njohur për integritetin, përvojën dhe përkushtimin në shërbim të komunitetit.

Në një tubim entuziast me qytetarë dhe mbështetës, kryetari i LDK-së, Lumir Abdixhiku, theksoi rëndësinë e këtyre zgjedhjeve, jo vetëm për Kamenicën, por për mbarë vendin.

 Ai e cilësoi kandidaturën e profesor Surdullit si një hap të sigurt drejt një qeverisjeje të përgjegjshme, zhvillimore dhe me vizion të qartë evropian.

“Sot në Kamenicë prezantuam një njeri me vlera të larta, me përvojë të pasur dhe përkushtim të sinqertë, profesor Shaip Surdullin. Ai është gati të udhëheqë Kamenicën drejt zhvillimit, me dinjitet e transparencë,” u shpreh Abdixhiku.

I plotë:

Në Kamenicë prezantuam kandidatin tonë për kryetar, profesorin Shaip Surdullin. Një njeri me integritet, përvojë e përkushtim, gati të udhëheqë Kamenicën drejt zhvillimit. 

Prezantuam dhe ekipin prej 20 kandidatëve për Kuvend Komunal në këtë qytet të vogël por me zemër dhe shpresë të madhe.

Por këto zgjedhje nuk janë të rëndësishme vetëm për Kamenicën. Këto zgjedhje janë vendimtare për LDK-në dhe për gjithë Kosovën. Sepse vota për Lidhjen Demokratike është vota që i jep fund populizmit, që i jep fund dështimit, që i jep fund gjuhës së urrejtjes që ka mbërthyer këtë vend. Vota për LDK është antidoti i vetëm kundër krizës së vazhdueshme. Është shpresa për zhvillim, për dinjitet, për një të ardhme evropiane.