Abdixhiku: BE të vazhdojë të ushtrojë presion mbi shtetin serb për fatin e të zhdukurve

Në Ditën Ndërkombëtare të të Zhdukurve, kryetari i Lidhjes Demokratike të Kosovës, Lumir Abdixhiku, ka dërguar një mesazh për të kujtuar viktimat dhe për të riafirmuar përkushtimin e partisë ndaj zbardhjes së fatit të tyre.

“Sot në Ditën Ndërkombëtare të të Zhdukurve, kujtojmë 1617 personat që vazhdojnë të mbesin të zhdukur gati një çerek shekulli pas përfundimit të luftës. Ata përfaqësojnë plagën më të thellë dhe më të dhimbshme të shoqërisë sonë, një plagë që kërkon drejtësi dhe zbardhjen e plotë të fatit të tyre.”, tha Abdixhiku.

Ai theksoi se Lidhja Demokratike e Kosovës riafirmon përkushtimin e saj ndaj kauzës për zbardhjen e fatit të të zhdukurve dhe qëndron krah familjarëve të tyre.

“Bashkësia ndërkombëtare, veçanërisht Bashkimi Evropian, duhet të vazhdojë të ushtrojë presion mbi shtetin serb, që ende mban të fshehur fatin e këtyre viktimave. Nuk ka asnjë dyshim se përgjegjësit e krimeve e dinë ku janë ato viktima.”, shtoi ai.

“Lidhja Demokratike e Kosovës, gjithashtu bën thirrje që procesi i zbardhjes së këtyre rasteve të intensifikohet, duke mos lejuar që harresa të zbehë të drejtën për të vërtetën.
Zbardhja e fatit të tyre mbetet një prioritet i yni i pandryshuar, dhe një detyrim moral ndaj të gjithë qytetarëve të Republikës së Kosovës.””, thuhet mes të tjerash.