A shkon LDK-ja në takim të thirrur nga presidentja, përgjigjet Bajrami

Deputetja e Lidhjes Demokratike të Kosovës, Hykmete Bajrami, ka thënë se janë të hapur për pjesëmarrje në takime me qëllim që të nxirret vendi nga ngërrçi institucional.

Pas dorëzimit të kallëzimit penal ndaj vendimeve të Qeverisë në detyrë, Bajrami para mediave tha se krejt kjo varet se për çka do të ftohej një takim i tillë.

“Ne e kemi vendosë këtë propozim në tavolinë, natyrisht që jemi të hapur të jemi prezentë në takime të tilla për të nxjerrë vendin nga ngërrci instituconal.

Krejt varet për çka ftohet takimi dhe se çfarë qëllimi do të ketë, por ka qenë propozim i yni që ytë gjitha partitë politike të mblidhen diku që t’i jepet fund ngërrçit politik”, tha ajo.

Theksojmë se Partia Demokratike e Kosovës ka thënë se është Presidentja e Kosovës që me rolin e institucionit mbi-partiak “mund të ndërmarrë hapat e nevojshëm për thirrjen e një takimi.”

“Në këtë frymë, konsiderojmë se Presidentja e Republikës, si institucion mbi-partiak dhe me mandat legjitim, mund të ndërmarrë hapat e nevojshëm për thirrjen e një takimi me të gjitha subjektet politike parlamentare. Një tryezë gjithëpërfshirëse, mund të jetë hapi i duhur për gjetjen e rrugëdaljes nga kriza institucionale.” – thuhet më tej në komunikatë.