Janë publikuar pjesë të tjera të bisedës nga komunikimi mes ish-Kryeshefit të Korporatës Energjetike të Kosovës, Nagip Krasniqi, ndaj të cilit ka të ngritur aktakuzë dhe Koordinatores së Komiteteve në Lëvizjen Vetëvendosje, Dejona Mihalit.
Sipas një bisede të publikuar nga Nacionale, Mihali i drejtohet me ftesë për takim në seli të Vetëvendosjes Krasniqit, por, ia bën me dije që të shkojë i kamufluar: “…me kapelë”.
Mihali është intervistuar nga Prokuroria Speciale javë më parë për këto komunikime.
Biseda mes tyre:
Mihali: “Po duam të të takojmë me Gazmendin. Kur mundemi?”
Krasniqi: “Të shtunën?”
Mihali: “Të shtunën kam këshill, të pretem në pasdite/mbrëmje?”
Krasniqi: “Jam në Vjenë. Kthehem nesër. Të premten kam mbledhje të bordit tërë ditën”.
Mihali: “Të dielën në 12:00”
Krasniqi: “Në rregull”
Mihali: “A po vjen te…me kapelë J”
Krasniqi: “Hahaha. Vij”.
Mihali: “Ok.”
Krasniqi: “Shihemi”.
Mihali: “Shihemi”.
Më herët u publikua një bisedë tjetër, ku Mihali e informon Nagip Krasniqin për shkrimet e mediave se kompania GEN e lidhur me Martin Berishajn, kishte përfituar 4.2 milionë euro gjatë kohës së krizës energjetike.
Para këtij raportimi, dorëzohet edhe Nagip Krasniqi i cili e konfirmon se “pak a shumë është i vërtetë”.
Mihali ia ka dërguar Krasniqit linkun e Gazetës Online Reporteri.net, përderisa reagimi i Nagip Krasniqit ishte i menjëhershëm.
Platforma ‘Signal’ që njihet si më vështirë e përgjueshme, ka qenë forma më e shfrytëzuar për komunikim ndërmjet koordinatores së komiteteve në Vetëvendosje, Dejona Mihalit, dhe ish-kryeshefit të KEK-ut, Nagip Krasniqi./Nacionale