A po iu ndalon ky faktor të humbni peshë?

Pesha e tepërt është bërë problem global sepse kjo e fundit shfaq një sërë komplikimesh shëndetësore dhe mund të ndikojë në mortalitet/vdekje të hershme. Problemi në shoqerinë tonë nuk është humbja e peshës por është mbajtja e peshës së humbur për një periudhë afatgjate.

Rolin kryesor në ngritjen e ritmit metabolik dhe termogjenezës (lirimi i energjisë në formë të nxehtesisë) e luan gjëndra tiroide. Gjëndra tiroide është një gjëndër e vogël, në formë të fluturës, e cila gjindet në pjesën e përparme të fytit, saktësisht poshtë mollës së Adamit.

Kur gjëndra flutur nuk prodhon hormone tiroide të mjaftueshme, balanci metabolik çrregullohet dhe rrjedhimisht pason shtimi i peshes.

Por kjo nuk do të thotë që humbja e peshës është e pamundur, vetëm se bëhet më e vështirë. Për të lehtësuar këtë rrugëtim këshillohet të konsultoheni me nutricionistin/dietologun tuaj.

Çrregullimi i tillë i gjëndrës tiroide quhet hipotiroidizëm dhe prevalenca e shfaqjes së kesaj sëmundje është 1 në 300 persona.

GazetaDemos ka kontaktuar nutricionistët e Partners in Diet, të cilët treguan se kjo sëmundje karakterizohet me këto simptoma:

• Shtimi i peshës
• Gushë e fryrë (goiter) dhe ngjirje e zërit
• Lëkure e thatë dhe flokë të dobët
• Tolerancë e dobët ndaj të ftohtit
• Kapsllëku
• Kujtesë e dobët dhe gjumë i çrregulluar

Nëse keni këto simptoma, ka gjasa që të diagnostikoheni me hipotiroidizëm.