A di t’i përdor armët Komandantja Supreme e Ushtrisë së Kosovës? Flet presidentja Osmani

Presidentja e vendit Vjosa Osmani sot gjatë ditës ka qenë për vizitë në Forcën e Ushtrisë së Kosovës, ku është pritur në takim edhe nga Komandanti Bashkim Jashari.

Ajo, në një konferencë për media i është përgjigjur pyetjes së gazetarit se a di ajo t’i përdor armët.

“Presidentja e Republikës së Kosovës i ka kompetencat e qarta kushtetuese sa i përket politikave të mbrojtjes. Për të përdorur armët janë ushtarët, e për të ndërtuar politikat e mbrojtjes në bashkëpunim me Ushtrinë tonë është Komandantja Supreme e Ushtrisë së Kosovës”, është shprehur ajo.

Osmani tutje i ka falënderuar ushtarët dhe komandën për punën dhe kontributin e tyre që janë duke e dhënë.

“Kishim takime përmbajtjesore me Komandantin e FSK-së dhe pastaj me shtabin e përgjithshëm i diskutuam të gjitha, çështjen mbrojtjes së Republikës së Kosovës, mandati kryesor i ushtrisë sonë është mbrojtja e shtetit, sovranitetit dhe integritet territorial”, ka thënë Osmani.