Popullsia në Shqipëri: 50,5 % gra dhe 49,5 % burra

Në Shqipëri, 50.5 për qind e popullsisë janë gra dhe 49.5 për qind janë burra. Në raportin e INSTAT ngrihet dhe shqetësimi për abortet ku në 1 mijë lindje prej vajzave 18-vjeçare shënohen 179 abortime.

Në fund të vitit 2024, popullsia banuese në Shqipëri përbëhej nga 50,5 % gra dhe 49,5 % burra.

Ndërsa popullsia e përgjithshme shënoi rënie për të dy gjinitë, shtesa natyrore mbeti pozitive, me 1.060 lindje më shumë se vdekje për gratë dhe vetëm 148 për burrat.

Sipas INSTAT, raporti gjinor në lindje rezultoi 108 djem për 100 vajza, mbi mesataren natyrore prej 105.

Nga 23.310 lindje të regjistruara në vitin 2024, janë evidentuar 4.192 aborte, ose 180 aborte për çdo 1.000 lindje, transmeton albinfo.ch.

Grupmosha më e prekur ishte 20-34 vjeç, periudha më riprodhuese e grave. Për adoleshentet, mosha 18 vjeç shënoi nivelin më të lartë të abortit me 179 raste për 1.000 lindje.

Në vitin akademik 2023-24 u diplomuan 28.193 studentë, ku 65,8 % ishin vajza. Në Arsimin Parauniversitar, gratë dominojnë stafin mësimor me përqindje mbi 70 %, ndërsa edhe në arsimin e lartë ato kryesojnë me tituj akademikë si Profesor dhe Doktor.

Fushat më të preferuara për vajzat janë biznesi, shëndeti dhe shkencat sociale, ndërsa djemtë diplomohen më së shumti në inxhinieri dhe teknologji

Në vitin 2024 policia evidentoi 2.528 gra autore të veprave penale, 6,3 % e totalit të autorëve. Nga 40 vrasje me dashje, 22,5 % kishin motiv marrëdhëniet familjare.

Dhuna në familje mbeti një problem i madh, me 1.456 gra të dëmtuara, kryesisht në Tiranë, Durrës e Fier. Ndërkohë, 1.447 të mitur u prekën nga krime të ndryshme, ku 401 ishin vajza dhe 1.046 djem. Në burgje u regjistruan 77 gra të dënuara, shumica për krime të lidhura me drogën dhe vrasje.

Ndryshe nga burrat, rreth 25 për qind e grave të burgosura kanë Arsim të Lartë, dhe 22 për qind marrin pjesë në kurse profesionale.