Cakolli komenton zhvillimet në Kuvend: “Shpikjet” e fundit të Bashës s’kanë asnjë vlerë juridike

Eugen Cakolli nga Instituti Demokratik i Kosovës ka thënë se seanca konstituive nuk mund të konsiderohet e përmbyllur pa zgjedhjen e të gjithë nënkryetarëve.

Ai në Facebook shkruan se “shpikjet” e fundit siç i quajti të kryetarit të Kuvendit të Kosovës, Dimal Basha, nuk kanë asnjë vlerë juridike.

“Rrjedhimisht, nuk mund të ketë materializim të asgjëje – as zhvillim të procedurave apo ushtrim të funksioneve parlamentare, e as rrjedhje të afateve kushtetuese”.

“Konstatimet (lexo: “shpikjet”) e fundit të Kryetarit nuk kanë asnjë vlerë juridike. I tërë ky non-sens politik tashmë mund të zgjidhet vetëm nga Gjykata – qoftë me konstatim të dështimit të konstituimit të Kuvendit brenda afatit 30-ditor, ose me shpallje të pavlefshme dhe përsëritje të procedurës së votimit për nënkryetarët e komuniteteve”.

“Ajo që ka rëndësi është të theksohet se sot, edhe një herë tjetër, u vulos fakti se deputetët e kësaj legjislature nuk i meritojnë ato pozita e funksione, e as qytetarët nuk e meritojnë një legjislaturë kaq absurd”, tha Cakolli.

Sot dështoi seanca përpjekja për ta zgjedhur nënkryetarin e pestë, e që do të duhet të ishte nga radhët e komunitetit serb.

Meqenëse nënkryetari i pestë nga komuniteti serb nuk u zgjodh, kryetari i Kuvendit, Dimal Basha njoftoi  se janë konsumuar të gjitha opsionet.

Ai bëri të ditur se të hënën, ai bashkë me nënkryetarët e zgjedhur, Albulena Haxhiun, Vlora Çitakun, Kujtim Shalën e Emilja Rexhepin, do të mbajnë takim rreth kësaj situate.