Reagon Elezaj për zjarret në Klinë: Ka dëme materiale, zjarrfikësit në terren për ta lokalizuar

Kryetari i Klinës, Zenun Elezaj ka njoftuar se disa fshatra të Komunës së Klinës po përballen me zjarre që kanë shkaktuar dëme të konsiderueshme materiale, shkruan Demos.

“Bashkë me drejtorin e DSHPE-së, Qendrim

Millakun, aktualisht ndodhemi në terren dhe jemi në koordinim të plotë me ekipet e zjarrfikësve, të cilët po punojnë pa ndërprerje për të lokalizuar dhe vënë nën kontroll vatrat e zjarrit.

Një falënderim shkon për ekipet e zjarrfikësve të Klinës dhe atyre nga Peja, Rahoveci dhe Gjakova, të cilët kanë ardhur menjëherë në ndihmë dhe po japin kontribut të çmuar në këtë situatë emergjente.

Lusim qytetarët të tregojnë kujdes maksimal dhe mos digjni hamulloret apo mbeturinat, pasi rreziku për përhapjen e zjarreve është shumë i madh dhe mund të shkaktojë pasoja të rënda për pronën dhe jetën e qytetarëve.

Komuna e Klinës do të vazhdojë të jetë e angazhuar me të gjitha kapacitetet për të menaxhuar situatën dhe për të mbrojtur sigurinë e qytetarëve tanë”, ka shkruar Elezaj.