Britania gati të ofrojë trupa për të mbrojtur hapësirën ajrore dhe portet e Ukrainës në bisedimet në Pentagon

Shefi i forcave të armatosura britanike pritet t’u thotë homologëve të tij amerikanë se Mbretëria e Bashkuar është e gatshme të dërgojë trupa për të mbrojtur qiellin dhe portet e Ukrainës, por jo në vijën e parë të frontit me Rusinë, teksa po intensifikohen planet për një marrëveshje paqeje.

Admirali Sir Tony Radakin, shefi i shtabit të mbrojtjes, pritet të marrë pjesë të mërkurën në takime në Pentagon, të cilat synojnë të finalizojnë se çfarë janë të gatshme të ofrojnë 30 vende të ndryshme për sigurinë kombëtare të Ukrainës.

Siç raporton “The Guardian“, Radakin pritet të konfirmojë se Britania do të ofrojë ushtarë për mbështetje logjistike dhe trajnime, por jo për t’i vendosur afër kufirit me Rusinë.

Zyrtarët kishin diskutuar më herët mundësinë e vendosjes së deri 30 mijë trupave për të mbrojtur objektet ukrainase, por ky numër është ulur për shkak të kundërshtimeve nga disa vende evropiane.

Një zyrtar britanik tha: “E mërkura është një moment vërtet i rëndësishëm. Asgjë nuk ndodh në Washington pa miratimin e presidentit, kështu që mbështetja që Trump dha për garancitë e sigurisë të hënën ka nxitur shumë lëvizje.”

Një tjetër zyrtar tha se Radakin do të përsërisë premtimet e bëra javën e kaluar nga ministri britanik i mbrojtjes, John Healey, i cili tha se Britania është e gatshme të dërgojë trupa në Ukrainë “për të siguruar hapësirën ajrore dhe detare dhe për të ndërtuar forcën e ushtrisë ukrainase”.

Ata theksuan se ministrat e shohin këtë si mbështetje logjistike dhe trajnime, jo si dërgim të batalioneve në vijën e frontit që mund të përfshihen në luftime.