Shaqiri nuk ‘ia fal’ Guardiolas – zbulon prapaskenat e largimit nga Bayerni

Ylli i Baselit, Xherdan Shaqiri, ka deklaruar se nuk ndjen asnjë pendesë për largimin nga Bayern Munich në vitin 2015, duke hedhur një kritikë të tërthortë ndaj trajnerit Pep Guardiola dhe duke përmendur suksesin me Liverpoolin në Ligën e Kampionëve si dëshmi e drejtësisë së zgjedhjes së tij.

Në një intervistë për ran.de, Shaqiri foli hapur për periudhën e vështirë që kaloi nën drejtimin e Guardiolës, i cili mori drejtimin e Bayernit një vit pas ardhjes së tij në klub.

I kufizuar nga lëndimet dhe mungesa e minutave – duke qenë zëvendësues i papërdorur në shtatë nga 16 ndeshjet e para të sezonit 2014/15 në Bundesligë – Shaqiri vendosi të largohej nga kampionët gjermanë në janar të vitit 2015, duke u transferuar te Interi, për të vazhduar më pas te Stoke City dhe Liverpooli, ku fitoi Ligën e Kampionëve në vitin 2019.

I pyetur nëse largimi nga Bayerni ishte vendimi i duhur, Shaqiri u shpreh se nuk pendohet për atë vendim.

“Po, ishte vendimi i duhur. Nuk shikoj prapa dhe nuk pendohem për asnjë nga lëvizjet që kam bërë”, u shpreh lojtari me prejardhje nga Zhegra e Gjilanit.

“Kam marrë çdo vendim me bindje të plotë dhe mendoj se karriera ime ka shkuar mirë”.

Deklarata e tij përbën një kritikë të tërthortë ndaj Guardiolës, nën drejtimin e të cilit ai nuk arriti të gjente hapësirën e dëshiruar.