Bëri kërdi me 100 mijë euro fajde, ky është i riu nga Prizreni që iu ngrit aktakuza

Prokuroria Themelore në Prizren ka ngritur aktakuzë kundër Ermal Krasniqit, i cili gjenden nën masën e paraburgimit nga 13 marsi, për shkak të dyshimit të bazuar mirë se i njëjti ka kryer veprën penale “Fajdeja”.

Sipas aktakuzës, që nga muaji korrik i vitit 2023 dhe në vazhdimësi, deri më 06 mars 2025, ka pranuar dhe kontraktuar shuma dukshëm jo-proporcionale të pasurisë në këmbim të shërbimit për personin tjetër, duke shfrytëzuar gjendjen e rëndë financiare të personit të tillë, papërvojën dhe paaftësinë e tij për të gjykuar.

“… në atë mënyrë që duke filluar nga muaji Korrik i vitit 2023, ia jep viktimës V.Q., shumën e të hollave prej 5,000.00 € (pesëmijë euro) për të cilën shumë e ngarkon viktimën me 15% kamatë, pra duke e obliguar atë t’ia kthejë 6,000.00 € (gjashtëmijë euro), duke vazhduar më tej, brenda një kohe të shkurtër, ia jep viktimës edhe dy herë nga 10,000.00 € (dhjetëmijë euro) në total 20,000.00 € për të cilat të holla e ngarkon të njejtin me 20% kamatë, praktikisht duke e obliguar atë t’ia kthejë 24,000.00 € (njëzet e katërmijë euro) dhe fill pas kësaj, viktima sërish pranon nga i pandehuri shumën e të hollave prej 25,000.00 € (njëzet e pesëmijë euro), të cilën shumë për shkak të vonesave disa ditore në pagesa, është detyruar ta paguajë në total shumën prej 40,000.00 € (katër dhjetë mijë euro), për të cilën më pas ka vazhduar të paguajë nga 6,000.00 € (gjashtëmijë euro) kamatë për muaj, me ç’rast aktualisht shuma e detyrimit prej 40,000.00 € (katër dhjetë mijë euro) ka arritur vlerën prej 51,000.00 € (pesëdhjetë e njëmijë euro)”.

Përveç kësaj, viktima pajtohet që nga i pandehuri ta blejë edhe një veturë, të cilën pas tre muajve do ta paguante 38,000.00 € për blerjen së cilës ia ka paguar të akuzuarit këstin e parë prej 8 mijë euro, mirëpo pavarësisht se i pandehuri ia pranon pagesën e shumës prej 8 mijë euro, ia merr sërish dhunshëm veturën, madje duke e obliguar atë që t’ia paguajë shtesë edhe 6 mijë euro të tjera me justifikimin se viktima e kishte shfrytëzuar veturën për një kohë të shkurtër.

Dosja tutje thotë se me qëllim që t’i rikuperojë humbjet financiare, viktima është detyruar që të hedh në shitje edhe dy banesa të tij, me ç’rast i pandehuri ka arritur t’i shkaktojë atij humbje financiare rreth 100 mijë euro nga të cilat humbje, viktima vazhdon t’i detyrohet të pandehurit edhe 48 mijë euro të tjera

Prokurori i çështjes me rastin e ngritjes së aktakuzës, i ka propozuar gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, i pandehuri të shpallet fajtor dhe të dënohet sipas ligjit.