Miftaraj thotë se mostrat e Agon Zejnullahut janë dërguar në Maqedoninë e Veriut

Ehat Miftaraj nga Instituti i Kosovës për Drejtësi ka thënë se pas raporteve të obduksionit, nga burimet ka marrë vesh se një nga shkaqet e vdekjes së Agon Zejnullahut është ngulfatja.

Miftaraj në emisionin Pressing në T7 tha se në raport nuk përmendet se nga kush është bërë ngulfatja, por se një nga shkaqet e vdekjes është ajo.

“Dje në mëngjes na erdh informata nga dy burime që kur është bërë obduksioni, një ndër shkaqet e vdekjes është edhe ngufatja. Aty nuk thuhet se ngufatja është bërë nga Policia por se një ndër shkaqet është edhe ngulfatja. Përvec obduksionit, IMK ka bërë edhe teste të tjerë që kanë të bëjnë me toksinat në trupin e të ndjerit”.

Ai po ashtu tha se mostrat e Agon Zejnullahut kanë shkuar në Maqedoninë e Veriut.

“Mostrat e Agonit kanë shkuar në Maqedoninë e Veriut, që do të thotë ne si shtet, kemi dështuar që të ndërtojmë mekanizma që ua lehtësojnë punën, jo vetëm Prokurorisë, Policisë por edhe edhe agjencive të tjera”, përfundoi Miftaraj.