Gjilani nis fushatën e korrje-shirjeve të mbi 3 mijë hektarëve me grurë

Në Komunën e Gjilanit ka filluar zyrtarisht fushata e korrje-shirjeve për vitin 2025.

Këtë vit, në territorin e kësaj komune janë mbjellë mbi 3,100 hektarë me grurë dhe 100 hektarë me elb, ndërsa në terren po operojnë rreth 50 autokombajna, të cilat pritet të realizojnë me sukses procesin e korrjes.

Për të parë nga afër nisjen e fushatës, të pranishëm ishin kryetari i Komunës së Gjilanit, Alban Hyseni, si dhe drejtori i Bujqësisë, Bajram Isufi.

Kryetari Hyseni theksoi rëndësinë e kësaj periudhe për komunitetin dhe ekonominë vendore, duke e quajtur fushatën një përpjekje të përbashkët për “bukën e sofrës”.

“Fermerët tanë janë gati, rendimentet janë të mira dhe bashkë po i japim forcë bujqësisë sonë. Faleminderit për çdo kontribut – nga fusha deri te sofrat tona”, u shpreh Hyseni.

Nga ana tjetër, drejtori i Bujqësisë, Bajram Isufi, njoftoi se përgatitjet teknike dhe logjistike janë bërë me kohë, duke krijuar kushte të mira për zhvillimin e fushatës pa pengesa.

Ai bëri të ditur se mbi 1,130 fermerë janë mbështetur për mbjelljet me grurë, përmes sigurimit të farës dhe plehrave artificialë.

“Përkrahja e fermerëve do të vazhdojë edhe më tej. Sivjet priten rendimente dhe cilësi shumë e lartë e grurit. Uroj që fushata të përmbyllet me kohë dhe pa probleme,” deklaroi Isufi.

Autoritetet komunale vlerësojnë se angazhimi i përbashkët i fermerëve dhe institucioneve është kyç për një fushatë të suksesshme dhe siguri ushqimore për komunitetin.