Zemra që rreh për popullin, emocionet e rralla të një polici kosovar

Shkruan Melos Zogaj, pjesëtar i Policisë së Kosovës

Të dashur qytetarë,
Të dashur njerëz të mirë të këtij vendi që më keni pranuar me zemër e më keni mbajtur të fortë me dashurinë tuaj…

E ndjej të domosdoshme të ndaj me ju disa fjalë që s’dua t’i mbaj më në heshtje, sepse falë jush, çdo ditë që vesh këtë uniformë, ndjej më shumë se përgjegjësi, ndjej krenari, ndjej dashuri të pastër, ndjej forcë.

Ju falënderoj nga zemra për çdo buzëqeshje që më dhuroni në rrugë, për çdo përshëndetje të sinqertë, për çdo “faleminderit” që më thoni, edhe kur nuk është e nevojshme. Ato fjalë, ato gjeste të vogla, janë gjërat më të mëdha që më mbajnë në këtë mision.

Ju më keni treguar se njerëzit tanë nuk i shohin policët vetëm si zbatues të ligjit, por si pjesë të jetës së tyre. Si vëllezër, si bij, si motra që dalin çdo ditë për të mbrojtur atë që duam të gjithë: qetësinë, sigurinë dhe dinjitetin e këtij vendi.

Ka ditë të lodhshme, ka net pa gjumë, ka raste që lëndojnë shpirtin… por gjithmonë, kur e ndjej dorën e popullit mbi supin tim, atë mbështetje që vjen pa interes, më rikthehet motivimi. Më rikthehet besimi se kjo punë ka kuptim. Dhe që sakrifica nuk është e kotë.

Ju nuk e dini sa shumë domethënie ka për mua kur një fëmijë më sheh me admirim, kur një nënë më thotë “ruaje veten”, apo kur një qytetar më jep një gotë ujë në vapë. Nuk janë thjesht veprime të zakonshme, janë dritë për shpirtin. Janë forca që më bëjnë të punoj jo vetëm me trup, por me zemër.

Po ju them me gjithë shpirtin tim: Unë e dua këtë popull.
E dua këtë tokë dhe këta njerëz që më kanë dhënë më shumë sesa çdo shpërblim material, më kanë dhënë besimin e tyre. Dhe këtë besim do ta mbaj me nder deri në frymën e fundit në detyrë.

Jam krenar që jam polici juaj.
Jam krenar që më keni pranuar jo thjesht si uniformë, por si një nga ju.
Jam i përjetësisht mirënjohur për motivimin që më jepni, për respektin që më tregoni dhe për forcën që ma jepni kur më shihni me sy të mirë.

Ju dua.
Dhe për ju, gjithmonë do të jap më të mirën time.

Me dashuri, respekt dhe mirënjohje të pafund,
Melos Zogaj
Polic i popullit të vet. / DrenicaSot/