Rritja e çmimit të rrymës godet ekonominë, Rafuna paralajmëron mbyllje biznesesh dhe varfëri në rritje

Rritja e çmimit të energjisë elektrike po rrezikon seriozisht bizneset dhe standardin jetësor të qytetarëve të Kosovës, vlerëson kryetari i Odës Ekonomike të Kosovës, Lulzim Rafuna.

Në një intervistë për Ekonomia Online, Rafuna shprehet se Kosova po bëhet një vend i pashpresë, për shkak të ndikimeve të mëdha që ka shtrenjtimi i energjisë në ekonomi dhe shoqëri.

Sipas tij, rritja prej 16.1 për qind e çmimit të rrymës po ndikon drejtpërdrejt në fuqinë blerëse të qytetarëve, ndërsa dalja në tregun e lirë e ka rritur çmimin e energjisë deri në 400 për qind, çka mund të çojë në mbyllje të bizneseve, rritje të papunësisë dhe varfërim të mëtejshëm të qytetarëve.

“Shtrenjtimi 6.1 për qind është shumë. Po ashtu, është shumë edhe dalja në tregun e lirë, ku prej 200 – 400 për qind ka shkuar, por nëse vazhdon kjo kokëfortësi që bizneset të mbahen në tregun e lirë, nuk do të flitet më për 400 për qind, por nuk do të ketë përqindje që do ta ndalë çmimin e energjisë elektrike. Ne importojmë energjinë. Bashkë me të, e importojmë edhe çmimin. Biznesi jo që do të mbyllet, por nuk do të mund të ekzistojë më në këto kushte dhe rrethana”, deklaroi Rafuna.

Ai thekson se rritja e çmimit të energjisë për qytetarët nuk ka qenë e drejtë, pasi ka ulur standardin jetësor dhe ka dobësuar aktivitetin ekonomik. Sipas tij, kur nuk ka fuqi blerëse, bizneset nuk mund të performojnë, ndaj është kundër rritjes së çmimit të energjisë si për ekonominë familjare, ashtu edhe për sektorin privat.

Rafuna paralajmëron se pasojat më të rënda do të ndihen në muajt e ftohtë, kur konsumi i energjisë rritet ndjeshëm.

Ai shton se prodhuesit vendorë po humbasin konkurrencën përballë produkteve të importuara, ndërsa eksporti po bie.

“Nëse mbyllen bizneset rritet papunësia, Kosova po bëhet një vend i pashpresë. Qytetarët nuk e vërejnë tani për arsye se nuk shpenzojmë shumë. Më së shumti çmimi do të vërehet nga fillimi i muajit tetor, kur moti të jetë më i ftohtë dhe të fillojë konsumimi i energjisë. Atëherë do të vërejë qytetari, por edhe bizneset. Po bëhemi një vend që do të do të na shfrytëzojnë të gjithë, të gjithë do të na shesin, ne nuk do të kemi prodhim. Janë të dhënat e fundit: vetëm 13 për qind e mbulojmë eksportin me import. Ne kemi ngecur, bile kemi rënie të eksportit. Në pesëmujor janë 1.6 miliardë që janë importuar”, theksoi ai.

Rafuna përfundon duke thënë se rritja e çmimit të energjisë është kosto shtesë për çdo prodhues, që e bën produktin vendas më të shtrenjtë dhe më pak konkurrues, si në tregun vendor ashtu edhe në atë ndërkombëtar.