Parlamenti iranian miraton pezullimin e marrëdhënieve me mbikëqyrësin bërthamor të OKB-së

Parlamenti iranian ka votuar sot për pezullimin e bashkëpunimit me Agjencinë Ndërkombëtare të Energjisë Atomike (IAEA), duke e cilësuar këtë hap si një përgjigje ndaj heshtjes së OKB-së për sulmet izraelite dhe amerikane mbi objektet bërthamore të Iranit.

Kryetari i Parlamentit, Mohammad Bagher Ghalibaf, u shpreh se vendimi u mor për shkak të refuzimit të IAEA-së për të dënuar publikisht sulmet ndaj infrastrukturës bërthamore të Iranit, gjë që sipas tij vë në dyshim besueshmërinë ndërkombëtare të agjencisë.

“Autoritetet bërthamore të Iranit do të pezullojnë bashkëpunimin e tyre me IAEA-n derisa të garantohet siguria e objekteve bërthamore,” tha Ghalibaf.

Ai paralajmëroi se programi bërthamor i Iranit do të ecë përpara me një ritëm më të shpejtë, duke theksuar se Teherani nuk do të ndalet në synimet e tij paqësore, por do t’i mbrojë ato me vendosmëri.

“Programi bërthamor paqësor i Iranit do të ecë përpara me një ritëm më të shpejtë,” u shpreh Ghalibaf në një deklaratë për median shtetërore.