Gjenerali iranian shfaqet në publik pas lajmeve për vdekjen e tij – VIDEO

Gjenerali iranian Esmail Qaani, komandant i forcave Quds të Gardës Revolucionare Islamike të Iranit (IRGC), është shfaqur në publik gjatë një tubimi në Teheran për të festuar atë që autoritetet iraniane e quajtën “Operacioni Fitorja Hyjnore” kundër Izraelit.

Sipas agjencisë iraniane të lajmeve Tasnim, Qaani është parë në mesin e qytetarëve të mbledhur për të shënuar fitoren, ndërsa televizioni shtetëror Press TV publikoi pamje ku thuhet se ai u prit “ngrohtësisht nga qytetarë të entuziazmuar”.

Kjo paraqitje publike vjen vetëm disa javë pasi gazeta amerikane The New York Times raportoi se Qaani kishte humbur jetën gjatë një sulmi ajror izraelit mbi objektiva ushtarake dhe bërthamore në Iran. Ky raport u vu në dyshim menjëherë nga autoritetet iraniane, të cilat tani pretendojnë se pamjet e fundit janë prova e gjallë e të kundërtës.

Brig. Gen. Esmail Qaani, Commander of the Quds Force of the Islamic Revolutionary Guard Corps (IRGC), who was rumored but never confirmed to have been eliminated during the initial strikes against Iran by Israel on June 13, appears to have indeed survived, being seen attending… pic.twitter.com/J8cNDqbF24

— OSINTdefender (@sentdefender) June 24, 2025

Ndërkohë, tensionet në rajon mbeten të larta. Pas pretendimeve izraelite se Irani po i afrohej prodhimit të një bombe bërthamore – pretendime të mohuara kategorikisht nga Teherani – SHBA ndërhyri me sulme të koordinuara, duke goditur tre objekte bërthamore iraniane. Pentagoni, megjithatë, njoftoi se “komponentët kyç të programit nuk u shkatërruan”.

Pas 12 ditësh luftime të ashpra ajrore midis Iranit dhe Izraelit, presidenti amerikan Donald Trump shpalli një armëpushim, i cili aktualisht është në fuqi.

Pamjet e publikuara dhe dalja e gjeneralit Qaani janë interpretuar nga media iraniane si një dëshmi e qëndrueshmërisë së udhëheqjes ushtarake të vendit në përballje me presionin ndërkombëtar.