Deco: Nico Williams ka vendosur t’i bashkohet Barcelonës

Drejtori sportiv i Barcelonës, Deco, ka konfirmuar se ylli i Athletic Club, Nico Williams, ka vendosur t’i bashkohet skuadrës blaugrana.

“Nico ka vendosur të bashkohet me Barcelonën. Është e vërtetë,” u shpreh shkurt dhe qartë Deco për mediat, duke konfirmuar lajmin që është përfolur prej javësh dhe që tani merr dimension zyrtar.

Ky është një zhvillim i madh në planet e Barcelonës për sezonin e ardhshëm, pasi Williams konsiderohet një nga talentet më premtues në futbollin spanjoll. Me shpejtësinë, teknikën dhe kreativitetin e tij në krah, ai pritet të jetë një armë e fuqishme në skemën sulmuese të Hansi Flick.

Transferimi i Williams do të kompletojë një ofensivë të frikshme për Barçën, ku do të rreshtohet përkrah Lamine Yamal, Raphinha dhe Dani Olmo, me Lewandowskin që pritet të ketë një rol më të reduktuar për shkak të moshës.

Barcelona tashmë ka arritur marrëveshje personale me lojtarin, ndërsa aktivizimi i klauzolës prej 58 milionë eurosh është vetëm çështje kohe. Klubi katalanas po përgatit gjithashtu largimin e disa lojtarëve për të liruar hapësirë në strukturën e pagave dhe për të mundësuar regjistrimin e përforcimeve të reja.