Ambasadori i Izraelit në OKB: Diplomacia me Iranin nuk mjafton më

Ambasadori i Izraelit në Kombet e Bashkuara, Danny Danon, ka shprehur skepticizëm ndaj përpjekjeve për një zgjidhje diplomatike me Iranin, duke deklaruar se “diplomacia vetëm për hir të bisedimeve” nuk është më një qasje e pranueshme.

Në një intervistë për CNN, Danon e cilësoi Iranin si “mjeshtër të mashtrimeve për shumë vite” dhe tha se bisedimet nuk do të kenë vlerë nëse Irani nuk angazhohet seriozisht për të “çmontuar kapacitetet e tij, për t’i neutralizuar plotësisht dhe për të ndalur pasurimin e uraniumit”.

“Por nuk jam i sigurt se janë gati për ta bërë këtë,” shtoi Danon.

Ambasadori, i cili e ka quajtur sulmin iranian ndaj spitalit Soroka në Izrael një krim lufte, u pyet gjithashtu për akuzat se edhe Izraeli ka kryer krime lufte me sulmet ndaj spitaleve në Gaza.

“Nuk mund të bëhet një krahasim i tillë. Ne ndjekim terroristët dhe u japim civilëve mundësinë të evakuohen nga ato zona”, u shpreh Danon.

Ai theksoi se Izraeli njofton civilët paraprakisht për operacionet ushtarake, përfshirë edhe në Iran, dhe se ushtria izraelite përpiqet të “minimizojë viktimat civile”.