Tahiri: Kolapsin energjetik e solli keqpërdorimi i qindra milionave euro nga zyrtarët e LVV-së

Deputeti i Partisë Demokratike të Kosovës, Abelard Tahiri, ka shpërthyer në akuza ndaj Lëvizjes Vetëvendosje lidhur me gjendjen në sektorin e energjisë, duke e quajtur “kolaps të plotë” të cilin, sipas tij, nuk e ka shkaktuar as ndonjë krizë globale e as mungesa e thëngjillit.

Në një postim në rrjetet sociale, ai thotë se arsyeja e vetme për këtë situatë është paaftësia, mungesa e vizionit dhe keqpërdorimi i qindra milionave euro nga zyrtarët e partisë në pushtet.

“Kollapsin energjetik nuk e solli as mungesa e thëngjillit, as ndonjë krizë globale. Atë e sollën paaftësia, mungesa e vizionit dhe keqpërdorimi i qindra milionave euro nga zyrtarët e LVV”, ka shkruar Tahiri.

Ai rendit një sërë dështimesh të qeverisjes pesëvjeçare të Vetëvendosjes në këtë sektor, duke përmendur:

Punësimin masiv të militantëve në KEK, duke anashkaluar profesionistët;

Kurdisjen e tenderëve për qindra miliona euro që, sipas tij, kanë përfunduar në xhepat e të afërmve dhe bizneseve të afërta me pushtetin;

Emërimin e zyrtarëve politikë në KEK, përfshirë të arrestuarin Nagip Krasniqi dhe ndikimin e “kapelës së zezë” Dejona Mihali;

Shitblerje të dyshimta të energjisë, të menaxhuara nga zyra ku punon vëllai i kryeministrit në detyrë;

Rritjen e tarifave për qytetarët me mbi 127% dhe për sektorin privat me mbi 270%;

Bllokimin e investimeve strategjike amerikane, si projekti “Kosova e Re” dhe gazpërçuesi amerikan.

Sipas tij, “ky është rezultati i një qeverisjeje që energjinë e trajtoi si pronë partiake dhe burim përfitimesh të paligjshme”.