Rama nga Samiti Evropiano-Arab: Prishtina u shfaq si një qytet inspirues dhe model për reformim

Kryetari i Prishtinës, Përparim Rama, ka bërë të ditur se më 6 qershor 2025 është pritur në takim nga Princi Dr. Faisal bin Abdulaziz bin Ayyaf, princ i Riadit, në kuadër të “Samitit Ndërkombëtar të Qyteteve Evropiane dhe Arabe”.

Përmes një postimi, Rama ka njoftuar se Prishtina ishte një nga kryeqytetet pjesëmarrëse në këtë ngjarje ndërkombëtare, ku, sipas tij, u prezantua si një qytet model dhe frymëzues për reformim urban.

“Prishtina ishte një nga kryeqytetet pjesëmarrëse në këtë samit dhe u shfaq si një qytet jashtëzakonisht inspirues dhe model për reformim.”

“Jam veçanërisht i lumtur që Prishtina po perceptohet gjithnjë e më shumë si një model për qasjen e re në konceptualizimin e qyteteve të zhvilluara, me një imazh gjithnjë më pozitiv në kulturë, art dhe – tashmë – edhe në diplomacinë urbane. Po pozicionohemi qartë në hartën globale si një aktor i rëndësishëm, dhe kjo është një arritje që na nderon”, ka shkruar ai.