Jo më gomone dhe kamionë, shqiptarët shpikin një metodë të re për t’u futur në Angli

Një metodë e re dhe alarmante e trafikut të emigrantëve është zbuluar së fundmi në Mbretërinë e Bashkuar, ku trafikantët e njerëzve po shfrytëzojnë boshllëqet në sistemin e sigurisë së trageteve për të kaluar emigrantë ilegalisht nga Franca në territor britanik.

Burime nga autoritetet britanike bëjnë me dije se emigrantët po futen në bagazhet e makinave që hipin në traget, dhe më pas, gjatë udhëtimit, kalojnë fshehurazi në kamionë të parkuar në kuvertë.

Kjo taktikë, e shpikur dhe e përdorur gjerësisht nga grupe kriminale shqiptare, konsiderohet “efikase dhe me rrezik të ulët” nga vetë trafikantët, shkruan Daily Mail.

Një ish-pjesëtar i ushtrisë britanike, i njohur me pseudonimin “Nick”, që ka punuar për një bandë shqiptare, zbuloi në një podcast të BBC-së se ai paguhej 3.500 paund për çdo emigrant që arrinte ta fuste në Britani me këtë metodë.

Plani është i thjeshtë: emigranti futet në bagazh të makinës në Francë, kalon kufirin përmes kontrollit kufitar në Calais dhe në traget, del nga makina dhe futet në një kamion duke prerë mushamanë e ngarkesës. Më pas, një bashkëpunëtor në Britani ndjek kamionin pas zbritjes nga trageti dhe e merr emigrantin në destinacion.

Shoferi i kamionit nuk ka dijeni për këtë ndërhyrje dhe megjithatë, nëse emigranti zbulohet, ai rrezikon një gjobë deri në 10 mijë paund.

Ish-shefi i Forcave Kufitare britanike, Tony Smith, tha se kjo është “një formë e re e kontrabandës kërkon vëmendje të menjëhershme”, duke shtuar se kapacitetet aktuale të kontrollit në Calais dhe Dover nuk janë të mjaftueshme për të ndalur çdo rast.

“Nuk ka asgjë që Forcat Kufitare mund të bëjnë nëse emigranti futet në kamion gjatë kalimit me traget, sepse automjeti është tashmë i verifikuar dhe i lejuar të hyjë në Mbretërinë e Bashkuar,” tha Smith për BBC Radio 4. Ai shtoi se përgjegjësia për sigurinë në tragete është e kompanive detare, dhe kontrolli i plotë i çdo automjeti do të sillte kaos për sektorin e turizmit dhe tregtinë.

Edhe pse qeveria britanike është fokusuar kryesisht te ndalimi i kalimeve me varka – që këtë vit kanë shënuar shifra rekord – raportet zyrtare paralajmërojnë se kjo vëmendje mund të ketë lënë hapësira për lulëzimin e metodave të tjera të trafikut.

Një raport i fundit nga Inspektorati i Policisë paralajmëronte se autoritetet po humbin mundësi për të ndaluar kalimet e emigrantëve me kamionë, duke e quajtur këtë një “zonë të rrezikshme të shpërfillur” nga politikat aktuale.

Në vitin 2023/24, janë regjistruar 1,276 raste të shoferëve të ndëshkuar për kontrabandë të pavullnetshme të emigrantëve, me një vlerë totale gjobash që kap afro 10 milionë paund. Ndërkohë, mbi 5,000 persona janë kapur duke hyrë fshehurazi në MB përmes mjeteve transportuese në Calais, Coquelles dhe Dunkirk.

Prej kohësh qeveria britanike është nën presion për të frenuar fluksin e emigrantëve, ndërsa premtimi i liderit laburist Sir Keir Starmer për të “shkatërruar bandat e trafikimit” është përballur me skepticizëm nga kritikët, të cilët theksojnë mungesën e një strategjie.

Vetëm të shtunën u regjistruan 1.,195 kalime me gomone – shifra e pestë më e lartë ndonjëherë – çka tregon se rrjeti i kontrabandës është jo vetëm funksional, por edhe në zhvillim e sipër.

Ndërsa qeveria mban sytë te deti, trafikantët shqiptarë po kalojnë pa u ndjerë nga kuvertat e trageteve.