Ngrihet aktakuzë ndaj grupit kriminal prej 11 vetash në krye me një izraelit

Prokuroria Speciale ka njoftuar se ka ngritur aktakuzë në Gjykatën Themelore në Prishtinë ndaj një grupi të organizuar kriminal prej 11 të pandehurve.

Sipas Prokurorisë Speciale, të pandehurit O.T, A.G, B.B., I.K., D.M., F.B., A.R., L.H., A.A., K.I., V.K. përmes kompanisë së regjistruar në ARBK, por të pa licencuar për ndërmjetësim financiar kanë kryer mashtrime të mëdha financiare nga tetori 2018 deri në nëntor 2022.

“Në krye të grupit ka qëndruar i pandehuri O.T. – shtetas i Izraelit, ndërsa pandehurit tjerë, duke u prezantuar si brokerë kanë mashtruar viktimat nga vende të ndryshme të botës, duke përdorur identitete të rreme dhe platforma të parregulluara investimi, ku fitimet e shfaqura kanë qenë vetëm simulime”.

“Viktimave iu kanë premtuar fitime të larta me rrezik minimal dhe në atë mënyrë i kanë nxitur të investojnë shuma të mëdha parash, të cilat pastaj janë transferuar në llogari të bizneseve të regjistruara dhe të kontrolluara nga grupi kriminal, duke u fshehur gjurmët financiare”, thuhet në njoftimin e Prokurorisë, transmeton Klankosova.tv.

Më tej, thuhet se me këto veprime, të pandehurit kanë kryer veprat penale “krim i organizuar”, “mashtrimi”, dhe të pandehurit O.T., dhe D.M., akuzohen edhe për veprën penale “shpëlarje e parave”.