Për çka dyshohen 16 të arrestuarit sot në veri?

Nga lokali i tij në Mitrovicën e Jugut, doli me duar të lidhura nën shoqërimin e zyrtarëve policorë.

Këta dyshohen për kryerjen e veprave penale “detyrim”, si dhe “importim, eksportim, furnizim, transportim, prodhim, këmbim, ndërmjetësimi ose shitje të paautorizuar të armëve apo materieve plasëse”.

Njëri prej tyre që përfundoi nën pranga është edhe një zyrtar policor serb.

Zëvendëskomandanti për rajonin e Veriut, Veton Elshani thotë se i njëjti është suspenduar.

Ky aksion është kryer në Mitrovicën e Jugut, Mitrovicën e Veriut, Vushtrri, Skenderaj dhe Leposaviq në koordinim mes Policisë së Kosovës dhe Prokurorisë Themelore në Mitrovicë.

Me një komunikatë të përbashkët këto institucione dhanë detaje se çfarë sekuestruan në këto lokacione.

“Nga ky operacion policor janë shoqëruar në Polici gjithsej 16 persona lidhur me dyshimin e kryerjes së veprave penale ‘detyrim’ si dhe ‘importi, eksporti, furnizimi, transportimi, prodhimi, këmbimi, ndërmjetësimi ose shitja e paautorizuar e armëve apo materieve plasëse’. Si dëshmi materiale gjatë kontrollit janë sekuestruar 9 armë zjarri, 200 fishekë, municione të ndryshme, 15 telefona mobilë, 2 palë pranga, thikë, tyta të armës, fatrolla për armë dhe 1 DVR”.

Me urdhër të prokurorit, nga 16 persona të shoqëruar nga policia, 13 u dërguan në mbajtje.

Ky operacion vjen pas hetimeve disamujore dhe u krye nga Drejtoria për Hetimin e Krimit të Organizuar dhe Krimeve të Rënda, me mbështetjen e njësive policore dhe Inspektoratit Policor të Kosovës.