Ismet Mehmeti nderohet me mirënjohje nga Njësitë Speciale të Policisë së Kosovës për mbi 15 vite kontribut në trajnim

 Instruktori i njësive speciale policore, Ismet Mehmeti, është nderuar me mirënjohjeje nga menaxhmenti i lartë i Njësive Speciale të Policisë së Kosovës, në vlerësim të përkushtimit të tij mbi 15-vjeçar në trajnimin e pjesëtarëve të policisë speciale në fushën e aftësive të specializuara policore.

Mehmeti e cilësoi këtë vlerësim si një dëshmi të bashkëpunimit të suksesshëm dhe angazhimit të përbashkët për forcimin e kapaciteteve operacionale dhe profesionale të forcave speciale. 

Ai theksoi se gjatë këtyre viteve ka pasur privilegjin të punojë me profesionistë të jashtëzakonshëm, të cilët me disiplinë dhe përkushtim kanë përvetësuar teknikat dhe aftësitë e nevojshme për të përballuar sfidat më komplekse të sigurisë.

Postimi i plotë:

Miq të dashur, 

Sot ishte një nder i veçantë të pranoj këtë letër mirënjohjeje nga menaxhmenti i lartë i Njësive Speciale të Policisë së Kosovës, e cila vlerëson mbi 15 vite të përkushtimit tim në trajnimin e pjesëtarëve të policisë speciale në fushën e aftësive të specializuara policore. Ky vlerësim është një dëshmi e bashkëpunimit të suksesshëm dhe përkushtimit tonë të përbashkët për forcimin e kapaciteteve operacionale dhe profesionale të forcave speciale.

Gjatë këtyre viteve, kam pasur privilegjin të punoj me profesionistë të jashtëzakonshëm, të cilët me disiplinë dhe përkushtim të lartë kanë përvetësuar teknikat dhe aftësitë e nevojshme për të përballuar sfidat më komplekse të sigurisë. Përmes metodave moderne të trajnimit dhe shkëmbimit të përvojave më të mira ndërkombëtare, kam kontribuar në ngritjen e standardeve të performancës dhe profesionalizmit të këtyre njësive elitare.

Kjo mirënjohje nuk është vetëm një vlerësim për punën time, por edhe një motivim i mëtejshëm për të vazhduar të jap kontributin tim në përgatitjen e forcave speciale, duke siguruar që ato të jenë gjithmonë të gatshme për të përmbushur me sukses misionet e tyre.

Besimi i Policisë së Kosovës në ekspertizën dhe përkushtimin tim është një përgjegjësi që e marr me seriozitet dhe përkushtim të plotë.

Në këtë rast, shprehi mirënjohjen time më të sinqertë për partneritetin e vazhdueshëm dhe bashkëpunimin e frytshëm me Policinë e Kosovës, Misionin e OSBE-se në Kosovë. 

Mbetem i përkushtuar që ky rrugëtim i suksesshëm të vazhdojë edhe në të ardhmen, duke ndërtuar mbi arritjet e deritanishme dhe duke forcuar më tej kapacitetet profesionale të njësive speciale, në shërbim të sigurisë dhe stabilitetit të vendit. 

Me respekt,

I juaji Ismet Mehmeti