“Vizita e shefit të NATO-s në Kosovë, dëshmi e qartë se NATO dëshiron paqe në Ballkan”

Presidentja e Kosovës, Vjosa Osmani e ka konfirmuar se Shefi i NATO-s, Mark Rutte, do ta vizitojë Kosovën.

Duke theksuar rëndësinë e kësaj vizite, Osmani ka nënvizuar se stabiliteti në Kosovë është faktor kyç për sigurinë e gjithë rajonit.

Njohës të çështjeve të sigurisë, vlerësojnë se vizita të tilla flasin për vazhdimësi të mbështetjes së NATO-s për Kosovën, ndërsa sipas tyre edhe Kosova duhet ta dëshmojë se vazhdon të jetë partner strategjik i saj por veçanërisht SHBA-ve.

Zyra e Presidencës, tha se gjatë takimit të presidentes Osmani me komandantin e KFOR-it në Kosovë kanë konstatuar se Evropa është duke u përballur me një situatë të ndërlikuar gjeopolitike, e cila sipas saj kërkon edhe koordinim të plotë mes partnerëve strategjik.

“Presidentja Osmani po ashtu theksoi se kontinenti ynë po përballet me një situatë të ndërlikuar gjeopolitike, e cila kërkon bashkëpunim të ngushtë dhe koordinim të përhershëm me aleatët tanë. Në takim u diskutua gjithashtu për koordinimin e aktiviteteve në prag të vizitës së paralajmëruar të Sekretarit të Përgjithshëm të NATO-s, Mark Rutte në Kosovë, duke theksuar rëndësinë e kësaj vizite si dhe rëndësinë e rolit të NATO-s për paqe e siguri në vendin tonë”, tha Presidenca.

Gjatë vizitës në Kosovë, Rutte do të jetë i shoqëruar nga ambasadorët e vendeve anëtare të NATO-s.

Ish-komandanti i FSK-së, Kadri Kastrati një vizitë të tillë e cilëson si vazhdimësi e mbështetjes së NATO-s për Kosovën dhe Ballkanin Perëndimor. Megjithatë, Kastrati thotë se Kosova vizitën duhet ta shfrytëzojë për ta dëshmuar se është në një vijë me interesat e SHBA-së dhe Evropës.

“NATO me këtë vizitë po jep mesazh se dëshiron që ta vazhdojë paqen në Ballkanin Perëndimor, por Kosova duhet ta shfrytëzoj këtë situatë ta dëshmojë se qëndron në interesat e SHBA-së dhe Evropës se Kosova është një vend që ka të ardhshme të ndritur krah partnerëve”, tha Kastrati.

Ish-zëvendësministri i brendshëm Valdet Hoxha, vlerëson se marr parasysh që Kosova konsiderohet si një pikë e nxehtë në Ballkan, politikën dhe diplomacinë duhet ta koordinojë me SHBA-të dhe aleatët e tjerë strategjik.

“Lidershipi ynë duhet të jetë vigjilent sy qelë që çdo vendim të jetë i matur i koordinuar me partnerët strategjik veçanërisht me SHBA-të në mbrojtje te integritetit territorial në mbrotjje te harmonisë perendimore dhe rendit te ri botëror”, tha Hoxha.

Delegacioni i NATO-s i kryesuar nga sekretari i Përgjithshëm do të vizitojnë edhe misionin e KFOR-it, në Kosovë. Në këtë mision aktualisht janë rreth 4700 ushtarë. Prej tyre kontingjentin më të madh e ka Italia me 1250 pjesëtarë, pasi e ka edhe komandën, ndërsa Shtetet e Bashkuara të Amerikës kanë rreth 600 pjesëtarë në këtë mision./RTV21